L’Academia de la Llingua Asturiana (ALLA) dio anuncia yá del entamu del periodu pa presentar candidatures al II Premiu Nacional de Lliteratura Asturiana, que va otorgase en 2020 «pa facer pública reconocencia del llabor normalizador que representa la creación lliteraria nel idioma d’Asturies y el fundamental papel que xueguen los y les escritores en llingua asturiana nel caltenimientu de la cultura del Pueblu Asturianu».
El Premiu Nacional de Lliteratura Asturiana, que tien calter triañal y cunta con una dotación económica de 3.000 euros, nun podrá xebrase en más d’un autor o autora, nun podrá ser declaráu ermu nin concedese a títulu póstumu. Na primer edición el ganador foi l’escritor Xuan Bello.
L’oxetivu de l’ALLA ye premiar «al conxuntu de toa una trayeutoria lliteraria, fecha a lo llargo del tiempu en llingua asturiana y la so contribución a la dignificación social del asturianu».
Pueden presentar candidatures, amás de la propia Academia de la Llingua Asturiana, les instituciones culturales y llingüístiques asitiaes nel territoriu del dominiu llingüísticu ástur y cualesquier de los miembros del xuráu, al traviés d’escritu empobináu a l’ALLA nel que se conseñarán los méritos lliterarios de los autores propuestos, asina como una amuesa representativa de la so producción escrita (al rodiu de 50 páxines). Les propuestes y la documentación habrán apurrise enantes del día 1 d’avientu de 2019.
El xuráu del Premiu Nacional de Lliteratura Asturiana formaránlu’l Presidente de l’ALLA, xunto a trés miembros de númberu de la institución, un representante de la Conseyería de Cultura, Política Llingüística y Turismu del Gobiernu d’Asturies, asina como dos personalidaes de reconocíu prestixu del mundu universitariu especialistes en lliteratura asturiana. La presidencia de l’ALLA fadrá tamién el llabor de presidencia del xuráu, mentanto que la representación de la Conseyería de Cultura, Política Llingüística y Turismu llevará la secretaría del mesmu o, nel so casu, la persona de menor edá de les que s’amiesten nel xuráu. La xera deliberadora del xuráu ha ser secreta y del resultáu daráse anuncia a lo cabero del mes de xineru del añu de la convocatoria.
El ganador o ganadora recibirán el premiu coincidiendo cola celebración del Día de les Lletres Asturianes. Arriendes de la dotación económica, el premiáu o premiada recibirá un Medayón Distintivu del Premiu. L’ALLA espublizará una pequeña antoloxía representativa de la producción lliteraria del autor.
