L’Institutu Asturianu de la Mocedá convoca la 31ª edición del programa de promoción de mozos creadores Culturaquí 2021 col fin d’impulsar les distintes modalidaes que conformen les artes plástiques, la lliteratura, el cine o la música ente’l colectivu de menores de 35 años.
Culturaquí ye tamién un mediu pa fomentar la participación de persones moces con inquietúes artístiques, y espublizar estes manifestaciones tanto nel Principáu como fuera de la comunidá.
La participación ta abierta a cualesquier artista que naciera o viva n’Asturies y que la so edá nun supere los 35 años a fecha 31 d’avientu de 2021. Tamién pueden participar descendientes hasta segundu grau d’emigrantes, lo cual dexó, dende 2008, internacionalizar el programa ensin arrenunciar a les bases d’asturianía sobre les que se sofita.
Culturaquí 2021 recueye siete convocatories diferentes:
- Muestra de Artes Plásticas. Va poder presentase cualquier tipu de propuesta artística: pintura, escultura, fotografía, dibuxu, grabáu, instalaciones, videoinstaciones, etc. La tema, la técnica y los materiales sonllibres. Un xuráu va escoyer un máximu de seis artistes, d’ente los que ún va recibir un premiu en metálicu de 500 euros, que van formar parte d’una esposición colectiva que va abrir el so puertes na Sala Borrón el próximu ochobre. Amás, va fallase’l Premiu Asturies Nuevu d’Artes Plástiques, dotáu con 200 euros y la realización d’una esposición individual tamién en Borrón. El plazu para presentar les obres remata’l 30 de xunu.
- Concursu de Maquetes pa grupos Pop y Rock. Esti certame faise en collaboración con Cadena Ser 40 Principales Asturies. Ta dirixíu a grupos o solistes intérpretes de música pop y rock. Va escoyese una maqueta ganadora, a la que se-y va apurrir un premiu en metálicu de 3.000 euros que tendrá de destinase a la edición d’un CD o un EP y un videoclip, pudiendo facer una serie de conciertos de promoción.
- Premiu Asturies Moza de Poesía, Narrativa y Testos Teatrales. N’asturianu o en castellán, les obres ganadores van llevar un premiu de 1.000 euros y van editase dientro de la Colección Texu.
- Programa d’esposiciones d’artistes plásticos mozos na Sala Borrón. Va poder presentase cualquier propuesta artística (pintura, escultura, fotografía, instalaciones, videuinstalaciones…) con llibertá de tema, técnica y materiales. Los proyectos escoyíos van formar parte de la programación de la Sala Borrón na temporada 2022-23.
- Premiu Nuevos Realizadores del Principáu en collaboración col Festival Internacional de Cine de Xixón. Van almitise los proyectos pa curtiumetraxes de tema llibre que se desenvuelvan en castellanu o asturianu y nun superen los 25 minutos de duración. Los trabayos presentaos habrán d’incluyir guion de curtiumetraxe, presupuestu, plan de rodaxe, memoria de dirección, fonte de financiación adicional, acreditación, plan, documentación y información. Establezse un premiu en metálico de 5.000 euros y el proyectu premiáu va estrenase nel Festival Internacional de Cine de Xixón 2022.
- El Premiu Astragal ta dedicáu a proyectos artísticos (instalaciones, videoinstalaciones, acciones, intervenciones y otros procesos creativos) que se faigan a costa fecha pa la sala d’esposiciones Espaciu Astragal del Centru de Recursos del Conseyu de Mocedá de Xixón. Cada artista o colectivu va poder presentar a concursu un proyectu creativu o obra diseñada específicamente pal ‘espaciu y tendrán de ser orixinales ya inéditos. Establezse un premiu en metálicu de 3.800 euros.
Premiu Nuevos Realizadores contra la violencia de xéneru. Convocase en collaboración col Festival Internacional de Cine de Xixón col fin de promover les actividaes artístiques como una de les alternatives más afayadices pa consiguir la sensibilización de la población na llucha contra la violencia de xéneru. Pa esti certame, van almitise los proyectos pa curtiumetraxes que se desenvuelvan en castellán o asturianu y nun superen los 25 minutos de duración. Los trabayos presentaos tendrán d’incluyir guion de curtiumetraxe, presupuestu, plan de rodaxe, memoria de dirección, plan d’esplotación y formatu d’exhibición prevista, cualquier fonte de financiamientu adicional, acreditación, plan, documentación ya información. Establezse un premiu en metálicu de 5.000 euros y el proyectu premiáu va estrenar nel Festival Internacional de Cine de Xixón 2022.
