¡Qué oportunidá tan guapa pa facer el meyor poema del mundu… n’asturianu! ¿Non? Pues esta ye la verdá: si lo de to ye la poesía, si yes una persona namorada de los bonos poemes y tienes una especial habilidá pa los versos, nun duldes en participar. Con esta oportunidá podrás demostrar a toles llingües del mundu que’l meyor poema del planeta pue tar escritu n’asturianu.
Nesti VIII Premiu Internacional de Poesía Xovellanos «El meyor poema del mundu», pueden participar toles persones que quieran y en cualesquier llingua de la Tierra. Con un poema de llibre estensión y tema, ye una oportunidá perguapa pa dar puxu a toes eses llingües que davezu nun se contemplen pa la lliteratura.
El premiu, valoráu en 2000 € y un diploma acreditativu, concederáse al poema ganador, pero tamién s’escoyerán finalistes que tarán presentes na edición d’un llibru de los meyores poemes del mundu, xunto al ganador.
El plazu d’entrega tará abiertu hasta’l 6 de xineru de 2021. El poema ganador lleeráse nel actu d’entrega del Premio Internacional de Ensayo Jovellanos na ciudá de Xixón. Na edición del llibru, los poemes presentaránse na so versión orixinal xunto a una traducción castellana.
¡Nun dexes de participar nesta gran oportunidá!
