La Dirección Xeneral de Planificación Llingüística y Normalización y l’Institutu Asturianu de la Mocedá entamen la cuarta edición concursu de microrrellatos improvisaos n’asturianu pa la xente mozo Entaína a escribir.
Nel marcu de la Selmana de les Lletres Asturianes, la Dirección Xeneral de Planificación Llingüística y Normalización y l’Institutu Asturianu de la Mocedá entamen Entaína a escribir. Cuartu concursu de microrrellatos improvisaos n’asturianu pa la xente mozo.
Van poder participar moces y mozos ente 14 y 35 años d’edá, que s’inscriban mandando un corréu a cridj@asturias.org. Nesi corréu tendrán d’incluyir namás el so nome, dos apellíos y fecha de nacimientu. Les inscripciones van poder facese hasta’l 6 de mayu del 2019 a les 14.00 hores.
El concursu va consistir na ellaboración d’un microrrellatu nun tiempu máximu de 20 minutos, a partir del tema ya indicaciones que’l xuráu dicte nel momentu d’escomencipiar a escribir.
El concursu va desenvolvese na sala Borrón el día 7, a partir de les 19.30 hores. Toles persones participantes van recibir un llibru como regalu.
Van concedese trés premios consistentes en llotes de llibros y discos. Otra manera, la Dirección Xeneral de Planificación Llingüística y Normalización va mirar pola promoción y divulgación de los microrrellatos ganadores y va poder incluyilos n’espublizaciones o antoloxíes qu’edite.
El concursu entamó a celebrase nel añu 2016 y dende entós vien cuntando con una participación estable d’alredor de quince o venti persones. nte los participantes del xuráu avecen a tar escritores de prestixu como Adolfo Camilo Díaz, Lourdes Álvarez o Esther Prieto.
LES EDICIONES ANTERIORES
La primer edición ganóla Inaciu Galán col testu «La fin de la pasión», quedando en segundu llugar Raquel F. Menéndez con «You nun conozo…» y Solinca Turbón nel tercer puestu con «Yá lo dicía». Na edición de 2017, la ganadora foi Raquel F. Menéndez con «Yá lo dicía…», quedando en segundu llugar Inaciu Galán por «La nuesa conexón» y repitiendo nel tercer puestu Solinca Turbón con «L’amor».
La edición del añu pasáu volvió ganala Inaciu Galán por «Una vida de luxu», quedando en segundu llugar Ánxela Gómez con «Camuda’l coral» y en tercer puestu Claudia Gutiérrez Lueje por «Qué bien…».
