Col aquel d’animar a la creación lliteraria en llingua asturiana, l’Asociación de Vecinos El Hórreo del Carbayedo, en collaboración cola Estaya de Normalización Llingüística del Conceyu d’Avilés, dependiente del Serviciu de Promoción Cultural de la Conceyalía de Cultura, y embaxo’l patrociniu del Conceyu d’Avilés, entama’l XV Concursu de microrrellatos n’asturianu «L’horru del Carbayedo».
Nel concursu pue participar cualesquier escritor/a en llingua asturiana, como muncho con dos rellatos orixinales, nun se almitendo los presentaos n’ediciones anteriores.
Los rellatos nun puen pasar de les 500 pallabres. La temática ye llibre, pero la redacción tendrá que respetar les normes ortográfiques y gramaticales marcaes pola Academia de la Llingua Asturiana
El plazu pa presentalos pieslla a les 14 hores del martes, 30 de payares. La presentación sólo pue facese per corréu lletrónicu, unviando los rellatos en formatu WORD a: avvelhorreo@yahoo.es. Los trabayos dirán encabezaos per un TÍTULU y firmaos namás con un NOMATU. Nel corréu lletrónicu axuntaráse un archivu aparte, tamién en word, que la organización (A. VV. El Hórreo) guardará en secretu, ensin que’l xuráu pueda conocelu enantes del fallu, colos datos siguientes: nome, teléfonu, señes, DNI, y títulu/os presentáu/os al concursu.
El primer premiu va ser de 500 euros y troféu; el segundu, de 300 euros y troféu. Los dos premios nun pueden recayer nel mesmu autor/a, pagaránse pente medies d’una tresferencia y, por llei, tarán suxetos a retención d’IRPF.
El vienres, 3 d’avientu, un xuráu formáu por persones rellacionaes coles lletres asturianes y la normalización llingüística, determinará los trabayos ganadores. El martes, 21 d’avientu, los/les autores lleerán los rellatos premiaos y recoyerán los trofeos, a les 19 hores, nel auditoriu de la Casa Municipal de Cultura d’Avilés.
Tolos rellatos presentaos, premiaos o non, espublizaránse editaos en cuaderninos que van repartise ente’l públicu asistente al actu d’entrega de premios y polos centros sociales y culturales d’Avilés. El Xuráu entenderá de cualesquier dulda o problema que puea apaecer. A les sos decisiones nun se pue retrucar.
