La Secretaría d’Educación, Universidá y Normalización Llíngüística de la FSA-PSOE, dirixida por María Luz Pontón, convocó’l segundu Concursu de microrrellatos en Twitter “Selmana Lletres FSA” col oxetivu de llanzar un menxaxe nes Redes Sociales al rodiu de la celebración de la 40 edición de la Selmana de les Lletres Asturianes.
El plazu del concursu abrióse’l 8 d’abril y va zarrase’l día 25. El xuráu, compuestu por representantes de la cultura, del periodismu y de la propia executiva, va valorar los tweets asoleyaos cola etiqueta #SelmanaLletresFSA.
Van seleccionase los 25 meyores microrrellatos. Los 3 primeros van recibir un llote de llibros y un diploma y el restu, un detalle y un diploma. L’actu d’entrega de premios va celebrase’l 30 d’abril.
El xuráu va tar compuestu pol escritor y periodista Inaciu Galán, Esther Prieto, poeta y editora n’Ediciones Trabe, Pablo Texón, escritor y profesor, y María Luz Pontón, secretaria d’Educación, Universidá y Normalización llingüística de la Federación Socialista Asturiana FSA-PSOE.
