L’Academia de la Llingua Asturiana (ALLA) entama’l III Premiu Nacional de Lliteratura Asturiana 2023 pa facer reconocencia pública del llabor normalizador que representa la creación lliteraria y del papel fundamental que xueguen los y les escritores en llingua asturiana nel caltenimientu de la cultura d’Asturies.
Darréu de lo anterior, l’ALLA fixa que’l premiu va cuntar con una dotación económica de 5.000€, nun pudiendo xebrase en más d’un autor o autora y nun pudiendo declarase ermu nin concedese a títulu póstumu.Amás, premiaráse al conxuntu de toa una trayeutoria lliteraria, fecha a lo llargo del tiempu en llingua asturiana, y a la so contribución a la dignificación social del
asturianu.
Podrán presentar candidatures al premiu l’Academia de la Llingua Asturiana, les entidaes culturales y llingüístiques asitiaes nel territoriu del dominiu llingüísticu ástur, cualquier de los miembros del xuráu, quince díes enantes de la celebración de la xunta. La presentación fairáse al traviés d’escritu dirixíu a l’ALLA, onde se conseñen los méritos lliterarios de la persona propuesta, xunto a una amuesa representativa de la so producción escrita (alredor de 50 páxines). Les propuestes y la documentación habrán apurrise enantes del día 9 d’avientu
de 2022.
El xuráu del Premiu Nacional de Lliteratura Asturiana formaránlu’l Presidente de l’ALLA, tres miembros de númberu de la institución, un representante de la Conseyería de Cultura, Política Llingüística y Turismu del Gobiernu d’Asturies, dos personalidaes de prestixu reconocíu nel mundu universitariu, especialistes en lliteratura asturiana y el ganador de la edición anterior.
La presidencia de l’ALLA fairá tamién el llabor de presidencia del xuráu, mentanto que la representación de la Conseyería de Cultura, Política Llingüística y Turismu llevará la secretaría del mesmu o, nel so casu, la persona de menor edá de les que s’amiesten nel xuráu. La xera deliberadora del xuráu ha ser secreta y, del resultáu, dará anuncia a lo cabero del mes de xineru del añu de la convocatoria.
El ganador o ganadora recibirá’l premiu coincidiendo cola celebración del Día de les Lletres Asturianes. Arriendes de la dotación económica, el premiáu o premiada recibirá un medayón distintivu del Premiu y l’ALLA espublizará una pequeña antoloxía representativa de la so producción lliteraria.
