El Conceyu Sariegu acaba de dar anuncia de la convocatoria, per cuarta vegada, del Concursu de Microrrellatos Luisa Rebollar «La Sariega». A ella pueden presentase obres escrites en llingua castellana o llingua asturiana hasta’l 22 de marzu a les 23:59 hores.
A esta convocatoria pue presentase cualquier persona mayor de 16 años residente nel estáu español y que pueda asistir a la entrega de premios en casu de ser nomada vencedora, que se va celebrar previsiblemente’l 1 d’abril, dientro de la XXVI Selmana Cultural de Sariegu qu’organiza’l conceyu. Amás, cada participante pue presentar un máximu de dos obres, les cuales nun han pasar de les 200 pallabres y han ser orixinales ya inédites. La temática de los microrrellatos ye llibre.
La entrega de los trabayos ha realizase al traviés del corréu lletrónicu a la dirección oijnava@comarcadelasidra.com indicando nel asuntu «Microrrellatu La Sariega» onde han tar axuntos dos documentos. En primer llugar, el rellatu ensin nome d’autor y col so títulu en formatu pdf. En segundu llugar, otru documentu en formatu PDF colos datos d’autoría de la obra. Nel casu de presentar dos obres, va haber que facelo en dos mensaxes diferentes col envís d’evitar confusiones.
Puedes consultar les bases completes del concursu equí.
