Tres la primer presentación dientro del ciclu «Uviéu Abierto», que foi la del llibru infantil «La curuxa Catuxa», obra d’Inaciu Galán y Vero Suari, la Dirección Xeneral de Política Llingüística llanza la segunda presentación de los premios convocaos pol Principáu. Nesti casu, trátase de «El Fervinchu», de Sidoro Villa Costales.
Esti actu, que va cuntar cola presencia del autor y la filóloga y profesora del IES Juan de Villanueva Liliana Díaz, va facese’l xueves 17 de febreru na Biblioteca Ramón Pérez de Ayala, a les 19:00 hores.
Nesta obra preséntense, con munchu humor negro y fondura psicolóxica, les dfíciles rellaciones ente los miembros d’una familia asturiana ente lo rural y lo urbano nos últimos años del sieglu XX, nuna narración coral bien entretenida qu’amiesta tonos cuando esperpénticos, cuándo tráxicos.
Sidoro Villa Costales (Lieres, 1962) ye profesor de primaria, ilustrador y escritor. Atendiendo pa esi ámbitu, tien publicaos dellos llibros infantiles y xuveniles: Llibru de los suaños (2007), ¡Nun-yos tengas perceguera! (2006), Mael al debalu (2010), Evaristo Valle, el pintor del antroxu (2011). Debutó como novelista con A estaya (Impronta, 2016), onde l’allegría y el bon xuiciu intenten nun se fundir braciando ente foles de soberbia y de maldá, nun escenariu apocalípticu de vallines fonderes y bastiazos nel que la naturaleza, omnipresente, algama un papel protagonista.
