Eva Cameán, del blogue de lliteratura Clarión, entrevista a Nicolás Bardio, escritor d’Uviéu (1987) llicenciáu en ciencies polítiques pola Universidá Complutense de Madrid. Nicolás tien diferentes publicaciones asoleyaes, como Sol Reló (Trabe editorial), Cuando ensamen les abeyes (Suburbia ediciones), y La Colomina 36, obra cola qu’algamó’l premiu Asturies Xoven de Narrativa nel añu 2019
Participó tamién n’espublizaciones collectives como revistes (Formientu, Estandoriu…) y en llibros como Vía de Serviciu (Suburbia ediciones), y Fecho na Cuarentena (Radagast ediciones). Ye’l creador de «Depués d’ochobre» el primer xuegu de rol n’asturianu, ambientáu nuna Asturies soviética nel 1970.
Güei vamos a face-y la entrevista rescamplu pa conocelo un poquitín más:
Bones Nicolás, ¿cómo lleves la cuarentena, yes del grupu que ta aprovechando’l tiempu pa lleer y escribir, o del que tamos faciéndolo menos de lo que nos prestaría?
Yo soi del grupu de los que ta aprovechándolo. Paezme que’l gran problema d’occidente – y los escritores nun somos una esceición – ye la falta de tiempu. Esta falta de tiempu iguóla la cuarentena. Peles males, claro; a costa de la vida social, de pareya y familiar y de xeneranos problemes económicos y dibuxanos un futuru enforma prietu. Pero la parte positiva a tolo malo, ye qu’agora hai más tiempu pa lleer y pa escribir…
¿Qué xéneru te presta más pa escribir?
Lliteratura fantástica anque, paradóxicamente, tovía nun asoleyare nada y ye del que más páxines tenga escrites. Cuido que colo que mos gusta, somos más esixentes. Por exemplu yo, tolo qu’asoleyé, foron coses que fixi ente descansu y descansu de trabayar na fantasía.
¿Y qué xéneru ye’l que te presta más lleer?
Fantasía y novela negra como norma, pero depués hai milenta esceiciones a esa norma. Al final descubrimos xoyes onde menos contamos veles.
¿Tienes dalgún vezu o zuna a la hora de ponete a escribir?
Si nun tengo per delantre unes cuantes hores, nun soi a poneme a escribir. Nun soi d’escribir a saltu de mata; anque de mozu sí podía. Y depués, o escribo pela mañana primero de xintar al meudía, o pela nueche a partir de la una. Pela tarde ye inviable.
¿Qué zunes llectores puedes confesamos?
Si nun m’enganchen les noveles, nun me fuerzo a lleeles. Tamién soi d’esa xente horrible que dobla les esquines de les páxines y dacuando sorraya.
¿El to escritor/a de cabecera?:
Voi escoyer triunviratu: Doyle, Tolkien y Lovecraft.
¿El to llibru clásicu preferíu?
El Señor de los Aniellos, On the Road, 1984, Harry Potter (el primeru), Treausure Island y de los nuesos, Potestas.
¿Tas trabayando en dalgún llibru/escribiendo daqué actualmente?
Toi corrixendo Depués d’Ochobre… y tamién toi escribiendo una novela de lliteratura fantástica d’un mundu que fui creando dende que tenía 17-18 años , pero que nun acabó d’encartiame. Lo típico que vas y vuelves; anque agora ye la primer vez que voi “con plan” y espero que salga. Ver veremos.
¿Si tuvieres qu’escribir un llibru con otru escritor, a quién escoyeríes?
A Blanca Fernández o a Victor Suárez; paezme qu’en xeneral interésennos les mesmes temátiques y compartimos una visión de per ónde tendría que dir la lliteratura asturiana.
¿Un llibru que nun fueras quien de rematar?
Munchos. Col que más me forcié y col que más lloñe llegué de toos foi Cien Años de Soledad. Lleí 3/4 partes pero nun fui pa con él. Otres coses de Márquez gustáronme, pero esi aburrióme como aburren poques coses.
¿Tienes dalgún personaxe lliterariu preferíu?
De neñu taba namoráu platónicamente de Luna Lovegood. Col tiempu sigo pensando que ye un personaxe interesante, misteriosu y que tien muncha más fondura de la que somos a aldovinar. Anque personaxes como Gandalf y Sherlock Holmes fascináronme de siempre, pola maxa y el conocimientu ún, pola intelixencia, el temple y les capacidaes d’observación l’otru.
¿A qué escritor reviviríes pa que pudiera siguir escribiendo?
Tolkien. Clarísimamente.
¿Un llibru col que llorasti?
Nun recuerdo llorar nunca con un llibru.
¿Cuála ye la to llectura actual?
La Misión del Bufón, de Robin Hobb. La segunda parte d’una de les triloxíes más prestoses que lleí anque llevo poco pa dicir nada.
¿Un llibru que tengas munches ganes de lleer?
A tale of two cities y la saga de Geralt de Rivia, Téngolos na llista de pendientes dende va tiempu, pero siempre hai dalgo más urxente que lleer; daqué que te regalan, daqué llibru que saca un amigu, un manuscritu que te manden…
¿Tapa dura o tapa blanda?
Blandia.
¿Llibros llargos o curtios?
Si son bonos, llargos.
¿Sagues o autoconclusivos?
Si son bones, sagues.
¿A quién te prestaría que-y ficiera esta entrevista?
A Xulio Arbesú, qu’anque nun lu conozo de nada soi mui fan de la so obra.
Y ya pa rematar, ¿qué llectura nos recomiendes pa esta cuarentena?
Güelu Ismail. Acabéla ayeri y prestóme muncho, y amás ta de baldre agora. Tamién podéis mercar por 0€ “Fecho na Cuarentena” d’Ediciones Radagast y si lo que queréis ye un clásicu p’animavos, Robinson Crusoe nun vien mal. Pa que nun se mos escaeza que les coses pueden ser tovía peores.
Milenta gracies Nicolás por participar na entrevista rescamplu, ye un placer lleete y averanos un poquitín más a los tos hábitos de llectura y creación!. Y a vosotres/os llectores, espero que vos prestara, bien llueu tendréis más entrevistes.
