Eva Cameán, del blogue de lliteratura Clarión, entrevista a Pablo Rodríguez Medina, escritor de L’Entregu, Llincenciáu en Filoloxía hispánica, especialista en filoloxía asturiana.
La so obra ta compuesta por publicaciones en castellán y n’asturianu, cultivando dellos xéneros lliterarios y algamando delles distinciones tanto n’Asturies como a nivel estatal.
Ente les sos obres n’asturianu podemos alcontrar llibros infantiles/xuveniles como Tapín de Picupáu (ALLA), Ello ye too la xente que nun mos compriende (ALLA); obres teatrales como Orbaya, Cantu de gaviotes o El Santu (ALLA, coleición mázcara de teatru);Poemarios como Tiempu d’esiliu y povisa ayenu (Ediciones Trabe), o Mil desiertos llugares (Impronta); y Noveles o publicaciones de rellatos como Fame d’amor determín de pasión (Trabe),Vivir ensín probalo (ALLA ), Les vueltes, toles vueltes (ALLA), y tamién participó en delles publicaciones colectives como Vía de Serviciu (Suburbia), Camín de Bimenes (Xébana).
Ente la so obra en castellán destaquen obres como Desbandada (Conceyu Talavera de la Reina) y Los laberintos del humo (Pre-textos).
Pablo Medina foi ganador dos vegaes del premiu de narrativa Xosefa Xovellanos con les noveles L’Arna de San Atanás y Fame d’amor determín de pasión. Foi tamién ganador del premiu Teodoro Cuesta nel 2006 col poemario Aires de Mudanza, y algamó otres distinciones como los premios de creación lliteraria y de teatru de la ALLA, premiu Asturies xoven de poesía ente otres munches distinciones.
Güei vamos a face-y la entrevista rescamplu ⚡ pa conocelu un poquitín más:
1. ¿Cómo lleves la cuarentena? ¿Yes del grupu que ta aprovechando’l tiempu pa lleer y escribir, o del que tamos faciéndolo menos de lo que nos prestaría?
Toi trabayando a esgaya por cuenta del insti… Ye munchu matu, pero pasa’l tiempu volao. Prestaríame tener más tiempu pa lleer y escribir. Siempre. Con cuarentena o ensin ella.
2.¿Qué xéneru te presta más pa escribir?
La novela, pero requier tiempu. Permítete mosar tou un mundu… Los relatos requieren de munchu pulsu y son un chispazu, como la vida mesma. Va tiempu que nun fago poesía nin teatru…
3.¿Xéneru que más te presta lleer?
La novela y el relatu. Tamién los llibros d’artículos.
4.¿Tienes dalgún vezu o zuna a la hora de ponete a escribir?
Cada vegada unu distintu. Préstame escribir en cafeteríes, cerca d’un ventanal viendo pasar la xente. De va tiempu fago un borrador y llueu trescríbolo a un cuadernu. Ye una manera d’obligase a reescribir y repensar les histories.
5.¿Qué zunes llectores mos puedes confesar?
Como les d’escribir, cada vegada distintes… Agora fago unes fichines y llevo un cuadernu onde apunto la mio rellación colos llibros: ónde lu merqué, lo que me chocó, fragmentos guapos, si m’aportó daqué…
6.El to escritor/a de cabecera (pueden ser varios):
¿Cómo decantase por unu cuando hai tantos y tan granibles? La elegancia de Camilleri; la tensión estilística de Rulfo; la profundidá sicolóxica de Marái; la capacidá pa crear mundos de García Márquez; el lirismu esteticista d’Umbral; la capacidá novelística de Galdós; la escritura esfollao de Jack London; el mundu lliterariu de Marco Denevi; el perspectivismu de Julian Barnes…
7.¿Los tos llibros clásicos preferíos?
Les aventures del Barón Münchaussen entá me sosprende a cada llectura. Totémicos pa min son Cien años de soledá y Pedro Páramo y el llano en llamas.
8.¿Tas trabayando en dalgún llibru actualmente?
Sí, pero mui de poco en poco… Hai bien de proyectos, pero nun hai tiempu y queden munchos en caxón.
9.¿Si tuvieres qu’escribir un llibru con otru escritor, a quién escoyeríes?
Al peor enemigu, porque díbemos acabar mal. La escritura esconsona l’egu y abúltame difícil la xenerosidá de ceder…
10.Peor llibru que lleeras:
Tolos llibros que nun fui a acabar.
11.¿Tienes dalgún personaxe lliterariu preferíu?
Hai tantos y tantos… Colasín, Montalbano, José Garcés, el coronel Aureliano Buendía, el barón de Münchaussen…
12.¿A qué escritor revivirías pa que pudiera siguir escribiendo?
Diz Joaquín Sabina nun cantar que «No hay nostalgia peor/ que añorar lo que nunca jamás sucedió». Quédome colo qu’escribieron. Porque lo que puedan escribir depués pue abultar decepcionante.
13.¿Escritor/a preferíu?
¿Solo ún? Ye tan difícil…
14.¿Un llibru col que llorasti?
«El brazalete de rubíes», un relatu de Kuprin que me tocó.
15.¿Cuála ye la to llectura actual?
Recién acabé’l primer volume de Crónica del alba, de Ramón J. Sender y toi entamando Salvar el fuego, de Guillermo Arriaga.
16.¿Un llibru que tengas munches ganes de lleer?
Llevo en cata d’ún dende neñu, porque nos faló d’él un profesor y nun lu atopo. Tengo ganes lleer, seliquino, posao dalgunos llibros como «Los seres imposibles» d’Antón Castro.
17.¿Tapa dura o tapa blanda?
Préstame más el papel flexible, que s’afaye… Y siempre cosíu, non que s’esfarraplen les fueyes. Nun soi cacosu pa les tapes.
18.¿Llibros llargos o curtios?
Llibros intensos. Llibros que nun puedas apestañar, que nun seyas a soltar, que lleas y relleas… Un llibru d’ochocientes páxines pue ser un suspiru y ún de setenta un martiriu. La estensión del llibru hai qu’entendelo como Bergson facía col tiempu.
19.¿Sagues o autoconclusivos?
Llibros que seyan una saga dientro d’ún. Autoconclusivos nun suelen ser bonos llibros, porque indica que te lo dan too fecho.
20.¿A quien te prestaría que-y ficiera esta entrevista rescamplu?
Creo qu’entamo a carecer del síndrome del xurásicu, que n’asturianu ye de burra vieya. Prestábame que fuere daquién de la xente que ta garrando’l relevu xeneracional con tanto puxu. Esa xente ye la que tien que falar agora y nós escuchalos: Xaime Martínez paezme un bon candidatu, neto que Diego Solís…
21. Y ya pa rematar, ¿ que llectura nos recomiendes pa esta cuarentena?
Lluvia d’agostu de Francisco Álvarez.
¡Milenta gracies por participar na primera entrevista rescamplu del blogue!
Y a vosotros/es llectores, espero que vos prestara, bien llueu tendreis máis entrevistes. Podeis dexar en comentarios a quien vos prestaría que-y ficiera la entrevista rescamplu
Déxovos unes semeyes bien prestoses que nos facilitó Pablo de les sos notes y cuadernos.
