Diego Solís (Xixón 1991) ye ún de los poetes más destacaos de la última xeneración d’escritores asturianos. Ganador del Asturias Joven de Poesía en 2018, tien escrito tanto n’asturianu como en castellán y asoleyaos bien de poemarios como Hágase abril (Ruleta rusa), Cállanos con esa música (Impronta) o Y el mundu marcha (Saltadera). Amás,dirixe’l programa La cla invisible de Play Presta. Xunto a ello, co-dirixe Formientu y fundó Fame Poétika, grupu col qu’organizó bien de timbes poétiques en dellos puntos d’Asturies.
Güei, el poeta xixonés siéntase con nós pa charrar del so proyectu nuevu, Volvemos en 6 minutos, onde axunta poesía, imaxe y soníu nun solu llibru.
Codirixes Formientu y tuvisti presente en les timbes poétiques de Fame mientres bien d’años. Ello ye, tas pronto de la poesía siempres. ¿Cómo foi cambiando nestos últimos años esti xéneru?
Va unos años hebo un “boom” de poesía en directu que, magar de que sigue teniendo ciertu tirón, yá nun ye lo que yera. Esto pudo afectar na poesía que se fixo, anque yo reconozo que poca de la poesía pensada pal directu espublicé en papel posteriormente; igual el poema “Manques” precisamente asoleyáu nesta revista y poco más. Agora creo qu’hai una vuelta al llibru físicu como talu. Puede que tamién eso influya y cada vez haya menos poesía prosificada y pensada pal recitáu públicu. Creo que sigue asentáu l’usu del versu llibre y que’l llector busca ediciones guapes y cuidaes. En “Volvemos en 6 minutos” al menos aposté por esa llínia d’una manera mui radical, anque en directu les veces que recité dalgún funcionó mui bien pol tonu autoparódicu que tien el llibru. Seya como fuere, too sirve y de toos se puede deprender, yo siempre respeté a toles propuestes que son a llegar a la xente.
Amás de na imaxe y nel soníu, ¿qué diferencia hai en Volvemos en 6 minutos de los demás llibros de Diego Solís?
La ironía y ciertu tonu satíricu col que traté dalgunes realidaes qu’igual enantes hubiere contao dende otres perspectives más habituales, más graves. Tamién l’usu deliberáu de realidaes efímeres, d’elementos que van pasar de moda (los eslóganes, les aplicaciones, les series….) o van quedar obsoletos por mor del propiu pasu del tiempu. Nos llibros anteriores había influencia del cine o la música, pero con una pretensión más atemporal. Ye una reivindicación de lo pop, de lo efímero, de lo banal que, quiciabes, nun lo ye tanto ¿o sí? ¡qué más dará!
¿Por qué decides axuntar poesía, imaxe y soníu en dalgo tan tradicional como un llibru físicu?
Más qu’una decisión mía, pedíalo’l propiu proyectu: surdió solo. Al ver el procesu de creación míu ya d’Inés H. coles ilustraciones vi que daba pa más que pa un llibru ilustráu…que ¿y si amás hai un clip que simule esi zapping que ye’l filu conductor? ¿y si aparte los poemes son la “voz n’off” como nos anuncios de la tele? Proando a ver qué pasaba surdió daqué orixinal y único, una nueva mena d’entender la edición de poesía. Ye traer al papel la poesía total, vela, sentila…la llírica en toles dimensiones, llevar la poesía (n’asturianu) a una experiencia que va más allá de lleer esi propiu fechu poéticu.
¿Cómo foi la creación d’esti proyectu?
Per un llau la propia escritura de los poemes y les idees de les ilustraciones que me surdieron viendo películes, cine…y reflexonando sobre elles. Too elementos que foron o me son inspiradores de dalgún mou. El contactu cola ilustradora pa dir plasmando eses idees de los poemes casi a la vez que los facía foi clave. D’un mou similar a cualesquier llibru illustráu Y per otru, el trabayu audiovisual fechu con Cuatro Gotes, onde tuvi que grabar los poemes nel estudiu y depués los clips, o al menos dar les idees pa estos. Amás de tar pendiente de cómo diben los productos que creamos coles idees de los poemes. Foi como escribir un llibru, grabar un discu, facer un proyectu de marketing…y tar pendiente de caún de los pasos de forma mui cuidada y pendiente del so avance: foi apasionante y prestoso realmente.
Tola obra xira alredor de la cultura pop y de lo que supón la televisión, el cine o’l móvil. ¿Ye una manera d’agrandar mires y nun quedar namás no que nos arrodia n’Asturies?
Yo fíxilo d’una forma totalmente espontánea y enfotáu nel sen artísticu, pero ye cierto que puede tener esa llectura anque Asturies, la so cultura y la so televisión tamién apaecen como ta Netflix o ta TCM al mesmu nivel. Agora la ‘Cultura pop’ construímosla nós y nel llibru ta Camín de cantares o ta Peaky Blinders, ta Fernán Coronas o ta Rosalía.
¿Cuál crees que ye la situación de la poesía anguaño en xeneral? ¿Ta nun momentu nel qu’otros xeneros tienen más valir?
N’asturianu hai cada vez más ufierta y cada vez más xéneros ganen tarrén, lo que ye tremendamente positivo pa la nuesa lliteratura, incluyido pa la poesía. Pero ta habiendo esi medre ensin que la llírica dexare d’ufrir frutos interesantes y calteniendo un nivel que creo que siempre foi altu y que ta al altor de cualquier otra lliteratura internacional.
