CUANDO…
ÁNGEL DE LA MORÍA
…YERA AUTOR MOZU
Ángel García Peláez “Ángel de la Moría” (Llanes, 1858-1895)
Esti autor del conceyu de Llanes tuvo que marchar pa Méxicu de bien mozu, con dieciséis años, anque nunca escaeció a Asturies nin a la so llingua. Dende ellí entamó a escribir n’asturianu. Fízose cura y tornó pa Llanes, onde morrió con trenta y siente años.
Ye unu de los primeros autores que se dan a conocer escribiendo na variedá oriental del asturianu. En vida asoleyó dos llibros, en 1892 “El pozu del Alloral”, la polémica que, n’asturianu oriental asoleyare con Pepín el Sardineru nes páxines d’El centinela español, periódicu mexicanu, y en 1893 “A teya vana”.
En 1887, con menos de trenta años y tovía dende Méxicu, apaez na reedición ampliada que fai Fermín Canella de l’antoloxía “Poesías Selectas en Dialecto Asturiano”, de Xosé Caveda y Nava, col poema que reproducimos, dedicáu al ríu de la villa de Llanes, el Carrocéu.
Llagrimina de Dios, rapaz parlleru,
Enriador y espumosu gorgoritu,
Gotera d’un llagar del infinitu,
Sorbiquín corredor y bullangueru.
Siempre rebizcador y gayasperu
Lixeru y blincador como un cabritu
Que sin mieu al escayu u al espitu
¡Abaxas dende’l monte hasta’l Riberu!
¿Qué música é meyor que to mormullu?
¿Qué cánticu hai igual a to sormiella?
Yo qu’aborrezo’l mundanal barullu
Y too sol corazón dura postiella,
Solu me queda’l placenteru orguyu
D’haber nacíu a to floriada oriella.
