Al paxarín que vola
de rama en rama
non contrando sitiu
y allegre canta;
Al vientín que gozosu
crucia caleyes
y sin pizca de xuiciu
muevi les fueyes;
Aquelles oliquines
que reblincando
por encima les peñes
mofu dexando:
Aseméyeste, neña,
así paeces
col garbu que gastes
d’eses maneres.
Al vete esa boquina
y esos güeyinos,
eses manes tan ñidies
y esos dientinos,
Al vete tan guapina,
tan llista y tiesa,
dichosu quien te lleve
digo depriesa.
En toa la quintana
no hai una moza
que se ponga a la to vera
a llavar ropa;
Si al són de la gaita
a bailar sales,
mozu non queda n’aldea
que tu non canses.
Tiénente envidia
toos n’aldea
y tamién te marmura
dalguna vieya.
Déxales que falen,
non faigas casu,
pos denguna t’allega
nin al calcañu.
Yá sé que te cases
con un buen mozu,
que por ti ta ciegu
igual qu’un topu.
Dios vos faiga felices
los dos xuntinos
y pan na masera
pa los fiínos.
Que la lluna vos dure
díis eternos,
que vos dea buena suerte
(y a min pa vevos)
