Sentaes baxo la solombra d’un vieyu carbayu, detrás d’esta particular casa ya ensin vida, imaxinábemos como sería’l nuesu futuru. Tu, una tierna moza de güeyos prietos y piel del color de la lleche, que contrasta col mio cuerpu escuru color café, y que crea un guapu tapiz de colores cuando nos abrazamos. Yo, una xoven con ganes de comer el mundiu y valtar toles muries qu’atopáramos al nuesu pasu.

Escapábemos de les miraes observadores, acusadores, y abellugábemonos nel nuesu paraísu particular. Demientres acolumbrábemos el paisaxe del ampliu valle que teníamos delantre de nós, fantasíabemos milenta tardes con vivir, nun futuru, nesa casa que cada día víemos delantre nueso, ya feble, ensin vida, escaecida, pero que pa nós yera’l llugar mas máxicu del mundu, el nuesu abellugu, cómpliz de los nuesos besos y afalagos robaos.

Los años pasen, y too camuda. Esta vida yá nun ye la collacia qu’imaxinábemos, pero daqué permanez dempués de too, siguimos xuntes.

La vida fíxonos tener que colar del nuesu llar, del pequeñu pueblu nel que vivíemos, y buscar un futuru “meyor” na ciudá, onde esperábemos alcontrar una situación llaboral digna, y sobre manera volvenos invisibles, escapar de los murmurios costantes y los xuicios innecesarios. Pero non too ye como parez, y nada ye tan fácil. Los prexuicios, los estereotipos, la falta de sensibilidá y la falta de respeutu tan en toes partes, al igual que la precariedá llaboral y la falta de salíes.

Tórnase too difícil, esi nun yera’l abellugu qu’esperábemos alcontrar cuando colamos. Volvímonos invisibles, pero solamente pa la falta de solidará y empatía. Entamamos a echar de menos la unidá del nuesu pueblu, la mirada observadora de la vecina que vixila tras la ventana si dimos o venimos, pero que se preocupa el día nel que’l pan ta demasies hores colgao nel gabitu de la puerta, esperando a que que lo recoyamos, ya interésase por si tamos bien o si pasó daqué; Esa vecina que trai una docena de güevos y un sacu patates cuando les coses tan difíciles, o la que s’ufre a cuidar a mio güela cuando tenemos que colar de casa por dalgún motivu.

Tornamos al pueblu, pa sorpresa de tol mundu. ¿Alcuérdeste de la cara de mios pas al venos apaecer de nuevu coles maletes? Nunca nun la escaeceré, pero tovía menos la cara d’allegría de la señora Carmen al enterase de que quedábemos en pueblu, nunca nun lo imaxináremos, siempres foi tan distante con nós.

Tornamos coles piles cargaes, cola cabeza enllena de reflexones… descubrimos que’l mieu ta dientro de nós mesmes, que somos enforma fuertes pa ignorar cualesquier tipu de comentariu, que nos amamos y que queremos vivir nel pueblu que nos vio crecer, coles nueses families.

Dexamos d’escondenos, y fuimos a vivir xuntes, a casa de los tos pas. Tornamos mentalmente a la infancia, y a l’adolescencia, a los paseos pela aldea, pela viesca, pela oriella del ríu, y sobre too a sentanos al pié d’aquel vieyu carbayu y observar lo que queda de la casa de los nuesos suaños, de la nuesa fantasía xuvenil, que cada vez tien menos vida y piérdese nel mar del escaezu; La vexetación entama a tapar les parees, y la naturaleza quier recuperar lo que yera d’ella…

Agora, cuasi 30 años dempués, voi cuntate una de les noticies más importantes de la nuesa adolescencia, por que tornamos a ella nesti mesmu minutu: ¡Eduardo viéndenos la casa! Si, si… la casa de los nuesos suaños, el nuesu abellugu en ruines, pero que sedrá’l meyor llar del mundiu, gracias a la to fuercia que lo inunda too.

Ta yá apallabrada, ta too llisto pa entamar a trabayar n’ella. Namás faltaba ser quien de cuntátelo y por eso t’escribo esta carta, sentada baxo’l nuesu árbol, na que ye yá la nuesa casa. Magar que falo tolos díes contigo, nel cuartu, na cocina, nel trabayu… esta noticia merecía quedar escitra per y pa siempre. Como’l nuesu amor. Esti será’l nuesu llar, magar que tu nunca llegues a pisalu, pero tarás nel tolos díes al mio llau, en cada centímetru. Nun sabes la falta que me faes, y lo muncho que t’echo en falta.

Quiérote Xulia.