Alba Nepomuceno García (2003), natural d’Uviéu , criose en Mieres pero anguaño vive en Xixón. Cursa’l Bachilleratu d’Humanidaes pa optar y enfocar los sos estudios nuna carrera especializada n’idiomes, siendo’l llinguaxe la vocación principal de l’autora, anque non la única, yá que tamién ocupa un llugar na so vida’l deporte, ganando dellos trofeos en torneos de llucha olímpica los que-y sirvieron d’inspiración pa dalgunos de los sos poemes y rellatos en prosa poética.

Participó en  recitales como Histeria Micro Abierto (Uviéu), La Nueche Violeta de Mieres del Camín, Xueves Versu (Avilés) o nos alcuentros poético-musicales entamaos nel RIES Xovellanos de Xixón. Tamién tomó la pallabra en distintos programes de radio como La Buena Tarde RPA, o Libros  Navegables d’APQ Radio, ente otros. Na actualidá ta presentando’l poemariu póstumu del so padre Juan Luis Nepomuceno tituláu «Nimio» per dellos conceyos asturianos. El so beneficiu va ser íntegramente donáu a l’Asociación Española Escontra’l Cáncer.

Agora ufrimos un testu na alcorzande del so pá, pal que cuntó col asesormientu llingüísticu d’Alma Hidalgo:

Güei escríbote porque pensate yá lo faigo en tou momentu; escríbote anque sé que nun voi atopar rempuesta. Recítote pa sentime dalgo más cerca ti, pa nun tener d’aceptar que yá nun tas y que nunca más voi tener la oportunidá d’abrazate. Poro, güei escríbote a ti y abrazo los tos versos. Lleo les nueses conversaciones pa tornar, per unos minutos, al pasáu onde tabes al mio llau, ónde m’aconseyabes, ónde m’animabes y preparabes para siguir alantre.

Escríbote a ti, pá, pues tovía nun tuvi’l valor hasta güei pa facelo, pero equí tamos; trés meses y diez díes pasaron de la nuesa dispidida. Prestaríame pensar que nun foi un “Adiós”, que ye un “Ta llueu” y que dende u teas me sigas en caún de los mios pasos.

Escríbote, lléote al altu la lleva, piénsote, almírote… Pero, sobre too, estráñote. Estraño los tos mensaxes, los tos emoticonos, les tos pallabres callaes, les tos sorrises, los tos enfados, el to golor, los tos güeyos… estraño too de ti. Y mentíte cuando dixi que taba preparada, mentime a min mesma y a tol mundu…pero lo único que deseaba yera’l to descansu.

Nun perdisti la llucha, ganástila. Pa min nun pierde quien ye arrastráu pola enfermedá que lu lleva, pierde quien nun pelea y nun pon enfotu en vivir colo que tien y el tiempu que pue. Decidisti cuándo, ónde y de qué mena, asina que nun ganaron, nun te disti y, por eso, güei escríbote a ti.