«Ni tu eres hijo de nadie,
ni legítimo Camborio.»
(Federico García Lorca, «Prendimiento de Antoñito el Camborio en el camino de Sevilla», Romancero Gitano).
Andar con pies estranxeros
na propia tierra
nun ye que seya cosa allegre;
tampoco cosa triste.
Ye,
ensin más.
Ye ser apátrida
nes mesmes caleyes
nes que medrabes
montáu nuna bici
d’aquelles que teníen una palanquina,
como los coches.
Trés piñones.
Ye mirar estrañu los praos,
los maizales,
les cases toes
nes que de guaḥe enredabes,
como un gochín de San Antón,
nos suétanos,
nos desvanes,
nos cabanones
(¡foi tan noble
la infancia nel mio llugar!).
Andar la propia tierra
con pies estranxeros
ye dicir y sintir
les palabres de siempre como cosa nueva,
cosa ayena.
Ye ver a los de siempre
como desconocíos.
Ye abrir los güeyos a otros mundos,
a ningún mundu.
Ye zarrar los güeyos al mundu,
al to mundu,
a tolos mundos.
Ye sabete ensin pasáu.
Ye sabete ensin futuru
(y matar el futuru
ye muncho más triste,
muncho más duro,
realmente desolador).
Andar con pies estranxeros
la propia tierra
ye volver a casa
sabiéndote
fíu de naide.
