L’asturianu tien delles pallabres
perguapes:
fesoria, llambiotada, migayes…
Nun me digas que les estrelles brillen
que los paxarinos vuelen
o que quies dir “de marcha”,
di que rescamplen
qu’esnalen
y que te presta dir de folixa
-o a correla, si se tercia-.
Si te ruxe’l butiellu,
nun xintes “bogavante”
“almejes”
o “rape”,
sinón bugre
amasueles
o pixín, yá lo sabes.
Pa salir de casa, ¡garra la zamarra!
-glayará to güela, siempre esmolecía
pol fríu y la xelada-.
Vete a un chigre
bebi sidra
-recién escanciao-
o un fervinchu
si tas amaláu,
reñi colos parroquianos
del Sporting o del Uviéu
da lo mesmo,
nada que nun tenga arreglu
con unes cachaes
y una partida tute
al tiempu.
Nun corras, vete a tou meter
nun saltes, blinca
anda pelo segao
comi’l bollu na xira
celebra l’amagüestu
o bailla’l xiringüelu…
Pero, sobre too, afáyate cola llingua
siéntila,
embébite
d’ella
pero, sobre too, fálala.
