Tanta tristura
Bramen los vientos tanta tristura
nesta tierra empruno. Tanta solombra
que priende pelos caminos, tanta mengua
de lluz como’l vafu apagao que mora
nos desamores. Tanta sienda per onde
percuerre’l riscar y la fría imaxen
de la muerte, l’aire murnio qu’apodrez
camín pa casa. Tanta pasera a nengún llau,
tanta sienda que come l’escaezu.
Cada nueche llega como un picazu
enriba’l corazón. Y ensin avisu
aporten los güelpes que l’amor sema
na memoria.
Tantes alcordances
que nada nun dicen. Y esti suañu
truñador, como una nublina qu’emburria
hasta’l vacíu.
Suerbo
Suerbo la lluz
qu’habita nos tos güeyos
y apágase la imaxen del amor
pelos caleyos.
Priende entós
un llumaral nes mios entrañes,
un batallón de formigues trepadores,
la serenidá puebla esti corazón
como la llume d’una farola
s’esparde en llinia reuta
y traviesa les llendes del fríu
pa morar nos espacios toos.
Suerbo la lluz,
la to lluz que me llanta
picadures como escayos
nos caleyos onde
tu sola t’escuendes
y yo sé alcontrate.
Nun espero más nueche
que’l desaniciu de la to imaxen
y un vacíu en pechu esperando
na puerta de mio casa.
Nun t’engaña la vida
Nun t’engaña la vida. Too lo devuelve
más llueu que pronto. Si arrampla
col fueu, abrirásete’l pórticu pal morrer
de les cenices.
Si colos besos, los mios llabios
pa calecer les nueches.
La ciudá
La ciudá ye una covacha
fecha de reconcomiu enteru
onde too cabe y nada nun s’atopa.
Busco la paz que s’apiega nos corazones
y que s’escuende nos caminos. En dalgún llugar
dalguién prometió l’amor y nada tocó
a los tos llabios.
Camino col pasu del barruzu
nesti pielgu que me niega’l besu
y ufierta namás un bardial de ceniza.
Y en mirándote, máncame’l futuru
qu’entá nun tuvi y yá perdí, máncame
el pórticu que lleva a nenguna parte
y que crucio tolos díes si digo’l to nome,
máncame l’aire mugoriento que llega
como un proyeutil cargáu de la negrona lluz
del pasáu.
La ciudá ye un ser abominable
qu’afonda na poza de la soledá. La sangre acedo
de l’ausencia circula pente los lladriyos
y espera’l llamáu
del silenciu.
