ACTU ÚNICU

 

Ye ‘l cielu. Una borrina blanca va espardiendo y apaecen dellos personaxes sentaos en sielles. Unos traen vistíos medievales, otros, de clérigos, dalgún otru ta ataviáu a l’ usanza dieciochesca y los últimos con vestimentes ya más modernes. Les sielles blanques que s’ abren n’ un corru. Delantre d’ ellos, una abertura dexa ver nel suelu un territoriu verde que colinda cola mar.

 

 

REI PELAYO

 

-Un día más aconceyamos señores, enriba de la nuesa Asturies.

 

 

BEATU DE LLÉBANA

 

-Deamos gracies al señor por ello.

 

REI FAVILA

 

-Qué pesaos estos cures. Dende llueu, qué cruz.

 

 

VALDÉS SALAS

 

-¡Oiga usté, nun me seya herexe o mónto-y un procesu! Coles ganes que teo de quemar a dalguién…

 

REI FAVILA

 

-Nun se si se da usté cuenta de que tamos en cielu y equí nun lo pue facer más que’l so xefe.

 

REI PELAYO

 

-¡Tendríeis que  tener tao en Cuadonga! Pel valle, cien mil sarracenos dispuestos a conquistar l’únicu reductu que-yos facía frente, y nós ¡mui pocos! ¡Quince, venti, trenta montunos! Guardaos na cueva esperando a…

 

REI FAVILA

 

-Por Dios, pá… ¡Cuadonga otra vegada non! ¡Lo que quiera menos eso, que yá llevamos milenta años escuchándolu y un poco ta bien, pero tanto yá cansa!

 

ALFONSO III EL MAGNO

 

-Fálenme de Cuadonga, pero yo dígo-yos ¡Lisboa! Eso sí que yeren campañes, con asturianos, lleoneses, gallegos, alaveses… pa conquistar la vieya Olisipo. ¡Eso sí, y non Cuadonga!

 

REI PELAYO

 

-Pero si nun fuere por nós nun llega a esi sitiu na vida.

 

ALFONSO III EL MAGNO

 

-Pues tamién ye verdá. Pero tien de reconoceme que si nun ye pola crónica qu’un servidor escribió, nin se falaría de lo de Cuadonga. Que los asturianos son mui collacios d’escaecer lo antiguo.

 

REI PELAYO

 

-¡Y tanto, Alfonso, y tanto! ¿Pa esto montemos un reinu? ¿Pa ser la trestienda de la Hispania d’entós?

 

XOVELLANOS

 

-D’entós y de la de agora, que nun cuenta pa naide. Si me ficieren casu na mio dómina… Metiéronme en Bellver y… ¡Yo si que diba sacar a flote a la mio Asturies!

 

URÍA

 

-Asturies fúndese, señores. Y nun importa a naide.

 

REI PELAYO

 

-¿Saben lo de cuando afuxía de los moros en Piloña? ¡Lloada foi esa xesta! Díxi-y yo al mio acompañante: ¡Alantre mio escuderu, que‘l mio caballu pie atopa! Y crucemos el ríu p’arribar a Cuadonga. Porque los milenta sarracenos que…

 

REI FAVILA

 

-¡Pá! ¡Ya val con Cuadonga!

 

REI PELAYO

 

-Mandesme callar tu, ¿el que foi devoráu por un osu? ¡Si me garra a min l’animal, déxolu fechu cintes ellí mesmo! ¡Claro, pero la decadencia asturiana vieno coles vueses xeneraciones, que nun valís pa nada!

 

REI FAVILA

 

-Gustáreme velu col osu delantre. Polo menos sucedióme‘l mio cuñáu y conquistó bona parte del norte.

 

BEATU DE LLÉBANA

 

-Alcuérdome yo cuando taba na villa de Santianes, na corte del Rei Silo. Nun m’enfrenté con osos pero ¡Quiá! Tenía que llidiar cola reina Adosinda y asegúro-yos que nun yera para menos.

 

REI PELAYO

 

-La mio nieta Adosinda siempre foi como so güelu, de caráuter. Non como los demás descendientes. Ún, desfechu por un osu y los demás desplazaos polos fíos, nenguniaos.

 

ALFONSO III EL MAGNO

 

-Oiga noble Pelayo, que a min nun me desplazó naide. Tenemos de saber cuando les fuercies d’ún yá nun son les mesmes.

 

REI PELAYO

 

-¡Enzarráronte en Valdediós! Nótase que la to sangre ye más de la de Pedru de Cantabria que de la de mio.

 

BEATU DE LLÉBANA

 

-Calma señores, calma. Nun vengan agora con teoríes del sangre que me fai recordar les mios riñes con ciertu preláu.

 

VALDÉS SALAS

 

-¿El de Toledo? Aquel Elipando debía ser un güesu duru d’afincá-y el diente, ¡llego a  pillalu yo y ármase la de coyer!

 

BEATU DE LLÉBANA

 

-El mesmu.

 

VALDÉS SALAS

 

-Nun sabe cómo lu comprendo padre, yo tamién tuvi enfrentamientos. ¡En Toledo nun hebo más qu’endemoniaos!

 

XOVELLANOS

 

-Cálmese Cardenal que Carranza tuvo‘l so merecíu.

 

BEATU DE LLÉBANA

 

-¡Non asina Elipando! ¡Valiente herexe adopcionista! Oxalá lu llevaren los demonios que dibuxé nos mios códices.

 

REI PELAYO

 

-Y dempués de Cuadonga persiguimos a los sarracenos hasta Tresvisu, onde…

 

REI FAVILA

 

-En díes como güei apetezme pasar a pantasma y tornar a Cangues d’Onís

 

VÁZQUEZ DE MELLA

 

-Pos maxestá, colos mios respetos, pero pa lo qu’hai de ver agora n’Asturies…

 

URÍA

 

-Razón tien, Vázquez, razón tien. Yá nun hai nada que facer. Imaxine que cuando yo yera Direutor de Fomentu del gobiernu impulsé cientos d’obres p’Asturies, ¡y nin asina coló del so aisllamientu secular!

 

XOVELLANOS

 

-Perdone señor Uría, pero usté tampoco fizo tanto. Si me lleguen a facer casu a min…

 

URÍA

 

-Don Gaspar, sabemos que fizo la Carretera Carbonera, y toes eses coses. Pero nun me quite méritos.

 

XOVELLANOS

 

-Y el proyeutu de canalizar el Nalón, y el puertu d’El Musel. ¿Pue creer que fui yo’l primeru n’apuntar la necesidá de mirar pa la mar? Agora costruyeron un puertu grandísimu que tien ¡fíxese! un bergantín que viaxa a Francia varies vegaes per selmana. Impensable na mio dómina. Pero nada d’eso sirve ensin un camín de fierru decente d’esos qu’inventaren los ingleses que comunique con Castiella.

 

URÍA

 

-Comunicación que yo llicité, y que foi costruyida gracies a min. Pero agora mientres el restu del país avanza, los bonos ferrocarriles nun arriben.

 

XOVELLANOS

 

-¿Nun se nomará usté Modestu por casualidá?

 

GONZALO MENÉNDEZ DE CANCIO

 

-Na mio dómina los asturianos destacábemos abondo, mírenme, yo que traxe‘l maíz d’América. O’l mio contemporáneu don Pedro Menéndez d’Avilés, que fundó la primer ciudá de lo que güei se nomen los Estaos Xuníos de les Amériques.

 

VALDÉS SALAS

 

-Y yo nel XVI yera Presidente del Conseyu de Castiella. Y fundé la Universidá d’Uviéu, ehí me tienen.

 

RAFAEL DEL RIEGO

 

-¡Y yo intenté traer la llibertá a España!

 

VÁZQUEZ DE MELLA

 

-Riego, usté yera un subversivu, y mire la qu’armó coles sos bobaes que llueu punxeron nel tronu a una usurpadora y non al llexítimu rei.

 

CLARÍN

 

-Vázquez, entama usté yá col so carlismu. Habríemos tener usté y yo unu de los mios famosos paliques.

 

VÁZQUEZ DE MELLA

 

-Ye que nun pue abrir la boca ún equí.

 

CLARÍN

 

-Calle, calle… Importantes fuimos los escritores asturianos ¿eh, don Antón?

 

ANTÓN DE MARIRREGUERA

 

-Y que lo diga. Olvidáronme cuasi del too, ¡a min!. ¡A min que gané los xuegos florales con un poema n’asturianu, compitiendo escontra otros en castellán, griegu y hasta na llingua llatina!

 

XOVELLANOS

 

-Ye que la llingua del pueblu morrió, rellacionáronla con paletos y yá ven. Entámase asina y fínase por nun saber la identidá d’ún. Dientro d’unos años el nuesu asturianu perderáse y parte del sentir d’ Asturies morrerá del too con él. ¿Nun-yos paez una barbaridá?

 

ANTÓN DE MARRIREGUERA

 

-Collaciu Xovellanos, por desgracia ta no cierto.

 

CLARÍN

 

-Ye que la lliteratura en castellán tien más difusión. Miren a Campoamor, a Palacio Valdés. ¡O la mio Rexenta! La meyor novela del sieglu XIX de les lletres españoles, ¡qué digo españoles, universales!

 

REI PELAYO

 

-Rediós, vaya fumos traen equí los señores estos.

 

ALFONSO III EL MAGNO

 

-Y que lo diga, llueu facémoslo nós y quéxense. Lo que ta claro ye que nun mos conoz cuasi dengún asturianu del sieglu XXI. Eso sí que ye morrer de verdá, el que nun s’alcuerde naide de ti.

 

BOBES

 

-Imaxinen que yo, al que nomaben “El lleón de los Llanos” nun-y sueno a naide y zurre-y la badana enforma a Bolívar en Venezuela.

 

XOVELLANOS

 

-¡Y otros tantos, señor Bobes, que nun los conocen! ¡Quintanilla, Álvarez de les Asturies, Cabal, Aurelio del Llano… cientos!

 

MANUEL LLANEZA

 

-Lo peor ye que llueu fuimos los burros de carga del restu.

 

 

VÁZQUEZ DE MELLA

 

-Sí, les nueses mines fueron el motor d’España. Y güei ya nun son na, los castilletes son testigos yá de la hestoria.

 

MANUEL LLANEZA

 

-De la hestoria y de les coles de xente ensin trabayu qu’inunden Asturies. Munchos  asturianos tienen de colar a busca’l pan fuera.

 

XOVELLANOS

 

-Por munchos allumaos que prometan coses, yo veo al nuesu Principáu sumíu no más prieto del pozu. Escaecióse la llingua, pararon les mines, terminó too. Nin ganaderíes hai yá, nin agricultura, nun hai un res. Si nos mios tiempos lo coyéremos a tiempu…

 

URÍA

 

-Y en cuestión d’obres, quédase bien atrás.

 

 

XOVELLANOS

 

-Porque yá nun importa a naide.

 

REI PELAYO

 

-¿Pa esto combatí yo en Cuadonga?

 

 

ANTÓN DE MARIRREGUERA

 

-¿Pa esto escribí yo n’asturianu, pa que s’escaeza una llingua tan guapa?

 

BEATU DE LLÉBANA

 

-Señores, los desiños del señor son inescrutables. Piensen que pue venir un resurdimientu de la tierra.

 

XOVELLANOS

 

-Olvídese, Beatu, pues eso nun pasará.

 

REI FAVILA

 

-Ponse ya’l Sol y ta equí la nueche. Colemos yá pa tornar mañana.

 

REI PELAYO

 

-¡Eso! ¡Y contare-yos la mio fuga de Toledo, y de Córdoba, y cuando taba por llegar a  Cuadonga!

 

REI FAVILA

 

-Decidío, mañana baxo a la tierra fechu pantasma.

 

XOVELLANOS

 

-Baxa a la tierra, sí, pero depués nun tornes pa dicimos como ta la nuesa Asturies pues dará pena.

 

MANUEL LLANEZA

 

-N’efeutu, dígo-ylo yo que fai poco tuvi pelos valles mineros y quiero más nun dir otra vegada.

 

Retírense los aconceyaos. Beatu de Llébana fala con Valdés Salas y con Vázquez de Mella, y Llaneza fai corru con Xovellanos y Uría que compiten continuamente. Faise la nueche. Colen toos.

 

REI PELAYO

 

-Faise la nueche yá. ¡Como n’Asturies! Pero como nun espierte del so sueñu, el día nun aportará. ¡Espertai, asturianos! ¡Espertai! ¡Que nun combatí yo en Cuadonga pa esto!

 

QUEDA DRAMATIZAO