L’actu celebróse nes instalaciones de Cuatro Gotes Producciones

La plataforma lliteraria Formientu.com y Cuatro Gotes Producciones, entregaron los premios del I Concursu de curtiumetraxe n’asturianu y gallego-asturianu Formientu, convocáu como parte de les actividaes entamaes nel #FormientuEnCasaFest. Nel actu, que tuvo una dimensiones reducíes pola mor de la situación sanitaria, cuntó cola presencia del xuráu del premiu, formáu por Pablo A. Quiroga, d’Algamar Producciones, los codirectores de Formientu, Claudia Elena Menéndez y Diego Solís, y el director de Cuatro Gotes Producciones, Inaciu Galán.

Diego Solís abrió l’actu felicitando a los ganadores y celebrando la bona participacion. Pablo A. Quiroga ya Inaciu Galán participaron dempués felicitando tamién a los ganadores y esplicando la so intención de buscar fórmules pa poder llevar a la pantalla los guiones de curtiumetraxe ganadores.

El xuráu entregó los diplomes y los premios a Fernando de Luxán pol testu “De cuando l’agua”, primer premiu, y a Lluis Rodrigo Menéndez por “Guetando a María García”, como segundu premiu. Dambos dos agradecieron el premiu y la iniciativa a los organizadores.

L’actu d’entrega tuvo llugar el sábadu 25 de xunetu nes instalaciones de Cuatro Gotes Producciones, nel barriu L’Arena de Xixón.

Fernando de Luxán (Madrid, 1985)

Nietu y bisnietu de cineastes, criáu na aldea de Porrúa. Vive a caballu ente Asturies y Madrid. Ye actor y guionista, llicenciáu n’Arte Dramáticu pola ESAD de Xixón. Actuó en llargumetraxes como “Gente en sitios”, “Biografía de un bebé”, series como “Capítulo 0”, y montaxes como “Iphigenia” de Producciones Nun Tris, compaxinando esti llabor cola escritura.

Como dramaturgu, destaca’l so trabayu en “Dark Smile” (2018-2019), un montaxe de teatru inmersivu, producíu por Madrid Destino embaxo la dirección de Rubén Cano. Dientro del circuitu alternativu estrenó obres como “Carnaval Barroco” (Festival de Santanyi,2.014) o “Desintoxicación healthy” (Microteatro por Dineru, 2.018). Escribió curtiumetraxes como “Otra partida” (Finalista nel I Festival de Almendralejo, 2.009) y “Nictofobia”(Estrenáu en Macabre Filme Festival y Zinema Zombie Fest, 2.015).

Apocayá coescribió un llargumetraxe de ciencia ficción en llingua inglesa, que ta en fase de financiamientu. “De cuando l’agua” ye’l so primer guión n’asturianu.

Lluis Rodrigo Menéndez (Méxicu, 1984) Llicenciáu en Drechu y Máster n’Alministración d’Empreses. Anguaño trabaya nuna empresa de Prevención de Riesgos Llaborales en Xixón y fai voluntariáu na Cruz Roxa d’Avilés. Ta trabayando nun guion de llargumetraxe n’asturianu.

Semeyes: Jennifer Berrocal.