El XVI Concursu de cuentos curtios del conceyu Cangas yá tien ganadores. El primer premiu na categoría n’asturianu occidental foi pal cuentu El picadoiru, de Raquel F. Menéndez y Marcos Martínez Fernández y el primer premiu n’asturianu normativu foi pal cuentu El frutu de la pasión, del escritor llionés Armando Gutiérrez Rodríguez.
El xuráu tuvo formáu polos escritores Elías Veiga y Laura Marcos, la filóloga Marta López y la responsable del Serviciu de Normalización Ḷḷingüística de Cangas, Mónica Rodríguez.
Los cuentos van poder lleese nes redes sociales del SNL de Cangas y acordies col xuráu «tán escritos cola corrección y l’arte que da la esperiencia lliteraria y constrúin hestories próximes al nuesu propiu contestu bien fundamentadas y desenvueltes».
Raquel F. Menéndez y Marcos Martínez Fernández, que presentaron un cuentu en coautoría, son occidentales de Salas y Tinéu, respectivamente; polo que conocen bien la so variedá ḷḷingüística. Amás, los dos son filólogos y participantes activos nel devenir cultural d’esta comunidá. La primera con una obra lliteraria más que reconocida, particularmente nel ámbitu de la poesía, onde destaca la so obra El llibru póstumu de Sherezade, premiu Nené Losada Rico del 2016, reconocíu, amás, como meyor llibru del añu 2017 pola Tertulia Literaria Malory y el segundu con una obra gráfica, que condensa maestría y simbolismu, recoyida embaxo la marca Indelendo.
Armando Gutiérrez Rodríguez, pola so parte, ye un ḷḷionés que cambió’l carbón pola pluma, dando cuenta d’un xeitu escepcional pa les pallabres. Tal ye asina, qu’esti mesmu añu ganó tamién otru certame bien conocíu, el XV Concursu de microrrellatos mineros de la Fundación Juan Muñiz Zapico.
La conceyala de Cultura, Carmen Riesco Combarro, felicitó a les personas ganadores «pol arte col qu’escriben y arriquecen les nueses lletres y anima a toles demás persones participantes a siguir contribuyendo cola so pasión a la dignificación de la nuesa llingua».
