La novela curtia de terror sicolóxicu y elementos sobrenaturales «L’Home les Caparines» ye la primer novela asoleyada pola escritora Blanca Fernández, quien yá ganare una bona cantidá de premios de rellatos tanto n’asturianu como en castellán. La obra preséntanos una lleenda y un pueblu misteriosu, Fontoria, onde la protagonista va descubrir la so hestoria familiar y que’l pasáu nun yera como ella pensaba. Trátase d’una obra que podría considerase como de realismu máxicu y abre la coleición de terror y sobrenatural «Guédé» de la que ye’l primer númberu.
Blanca Fernández (Bimenes 1994), que yá ganare’l premiu Radagast de Novela de Fantasía, Ciencia Ficción y Terror el mes pasáu con otra obra que ta pa publicar, conviértese asina na novelista más moza de la lliteratura asturiana y nuna de les poques muyeres qu’escribieron una novela n’asturianu con namás 27 años.
El llibru, que tien un prólogu de la tamién escritora y vicepresidenta de l’Academia de la Llingua Asturiana Marta Mori d’Arriba, tien un preciu de venta al públicu de 12€ y tuvo una bona acoyida na Selmana de les Lletres, onde munches llibreríes agotaron les esistencies. Esto demuestra, en pallabres de la editorial, «la demanda qu’hai d’obra nuevo d’escritores moces; que non siempre tienen sitiu a la hora de facese oyer nel sistema lliterariu asturianu.
