El ciclu de charres Escuela Paisana, entamáu pol Serviciu de Normalización llingüística de la Comarca de la sidra en collaboración col conceyu de Cabranes, llega esti añu a la so segunda edición con una interesante programación que se va desarrollar los próximos trés xueves 10, 17 y 25 de payares.
Nel primer d’ellos la esperta Pilar Fernández va ocupase de la historia de la lliteratura asturiana escrita por muyeres, con especial atención a la filóloga y escritora cabranesa Maria Xosefa Canellada, autora d’un llibru clásicu de la lliteratura infantil n’asturianu como ye Montesín.
La segunda sesión va tar dedicada a la proyección de ‘8 filmes sobre la guerra’, del director Pablo Casanueva, especie d’álbum audiovisual formáu por ocho cortumetraxes nos que s’avera a la represión franquista nel conceyu Ribeseya. Un repasu polos testimonios, la investigación hestórica y la documentación d’archivu.
Pondrá’l ramu a les xornaes l’etnógrafu Xose Antón ‘Ambás’ con ‘Aportaciones novedoses na recoyida de tradición oral n’Asturies y Cabranes’, faciendo un percorríu peles últimes novedaes incorporaes al so archivu de la tradición oral.
Tolos actos van a desenvolvese na Casa Conceyu de Santolaya a les 19:00 hores.
