Ediciones Trabe ta acabante sacar al mercáu Un guaje de barrio, de Chema Castiello. Nél, l’autor, amuesa unes pincelaes autobiográfiques de cuando neñu y adolescente dotaes d’una estraordinaria eficacia narrativa, llevanta una especie de ponte pa un mundu y un tiempu yá desapaecíos, pero que de xuru quedaron grabaos a fueu na acordanza de toa una xeneración: un caóticu desarrollu urbanu, unos oficios artesanales que se resistíen a morrer, unos tipos humanos inescaecibles, la vida d’una xente marcao pola escasez y la incertidume ante’l día de mañana, un poder político-relixosu asfixante… Y metanes de too ello, los xuegos infantiles, la llegada de l’adolescencia, l’espertar de la sexualidá, el descubrimientu de la dura realidá social, el compromisu políticu y munches ilusiones tovía por vivir.
José María, Chema, Castiello (Xixón, 1952) ye doctor en Ciencies de la Educación pola Universidá d’Uviéu y tien una llarga trayectoria como profesional de la enseñanza pública. Ye ún de los promotores del grupu de renovación pedagóxica «Eleuterio Quintanilla», onde ta especializáu nos problemes relativos a la población inmigrante.
