Nesta cuarentena na que poco podemos facer pa combatir l’aburrimientu en casa, el Conceyu de Corvera convoca cuatro concursos p’amenizanos el confinamientu de los vecinos baxo’l lema #corveraencasa. Ente los cuatro concursos, el consistoriu repartirá 1000 € en premios. Los concursos son los siguientes:
- Concursu de cine piquiñín #corveraencasina
Pa participar nesta convocatoria namás tienes que echar mano del to teléfonu móvil y crear un curtiu que pue ser de ficción o de tipu documental. Podrán tar grabaos con una sola toma o tar ellaboraos con edición o montaxe. En castellán o asturianu, tendrán que venir acompañaos colos créditos de les persones participantes y mostrar los drechos de los respectivos cantares o efectos utilizaos, nel casu de qu’haya.
En cuantes a la edá de los participantes, esistirán dos categoríes: una categoría A ente 12 y 17 años, y una B a partir de 18. Cada participante pue unviar hasta un máximu de trés curtios y una duración non superior a los 4 minutos.
El plazu de presentación sedrá hasta’l 19 d’abril de 2020 y los premios por categoríes consistirán en dambes d’un cheque regalu pa consumir n’establecimientos del conceyu de Corvera con un valor de 60 € pal ganador, 40 € pal segundu y 25 € pal terceru.
- Concursu de diarios personales #corveraencasina
Pa esti concursu, la temática sedrá l’actual situación de crisis sanitaria siempres y cuando nun tea representada de forma ofensiva hacia nengún miembru o colectivu. Los diarios podrán tener calter realista o ficticiu, al igual que nel concursu anterior.
Podrán participar todos aquellos interesaos qu’habiten nel conceyu de Corvera n’Asturies, tanto de forma individual como colectiva.
Les obres nun podrán tener una estensión superior a 1000 pallabres, y pueden tar escrites tanto n’asturianu como en castellán, debidamente presentaes en PDF.
El plazu de presentación tará abiertu hasta’l 19 d’abril, y los premios responderán a dos categoríes, una A (ente 12 y 17 años) y una B (a partir de 18 años), con un valor d’un un cheque de regalu pa consumir n’establecimientos del conceyu de Corvera con un valor de 60 € pal ganador, 40 € pal segundu y 25 € pal terceru, en dambes categoríes.
Los talleres de teatru de Corvera, amás, representarán los diarios ganadores colos que se fadrá una gala especial nunca fecha inda por determinar nel teatru El Llar y/o online.
- Concursu de pintura y dibuxu #corveraencasina
Nesti otru concursu, los más pequeños de la casa podrán espresar les sos sensibilidaes artístiques presentando hasta’l día 17 d’abril dibuxos de cualesquier estilu artísticu onde se reflexe’l día a día del confinamientu pol Covid-19, como pue ser, por exemplu, un retratu de los familiares, una habitación, el paisaxe dende la ventana, etc.
Habrá trés categoríes pa esta convocatoria, y podrán unviase hasta trés dibuxos por persona:
– Categoría A, hasta 5 años. Con un premiu d’un cheque regalu de 25 € pal primer puestu y 15 € pal segundu pa consumir nel comerciu corveranu.
– Categoría B, de 6 a 8 años. Con un premiu d’un cheque regalu de 50 € pal primer puestu, 25 € pal segundu y 15 € pal terceru, pa consumir nel comerciu corveranu.
– Categoría C, de 9 a 12 años. Con un premiu d’un cheque regalu de 50 € pal primer puestu, 25 € pal segundu y 15 € pal terceru, pa consumir nel comerciu corveranu.
- Concursu de fotografía #corveraencasina
El cuartu y últimu concursus consiste nuna convocatoria de fotografía onde podrán participar persones mayores de 13 años empadronaes nel conceyu de Corvera. La temática ambiéntase nel xuegu infantil VEO/VEO, en buscar la guapura, el menxase espresivu nestos días de confinamientu obligatoriu onde un xuegu tan simple pue xunir a munches persones al traviés de les ventanes.
Cada participante podrá presentar hasta un máximu de trés obres orixinales e inédites con un títulu tanto n’asturianu como en castellanu o cualquier otru idioma.
El plazu d’admisión de les obres tará abiertu dende’l 26 de marzu hasta’l 19 d’abril de 2020, y otorgaránse los premios d’alcuerdo con dos categoríes: A (de 12 a 17 años) y B (a partir de 18 años). Caúna d’elles cuntará con trés premios, un primeru de 60 €, un segundu de 40 € y un terceru de 25 € correspondientes a un cheque regalu a conscumir nos establecimientos de Corvera.
¡Nun dexes de participar na categoría que más te guste, aprovechando les circunstancies como un puntu positivo nestos díes de confinamientu!
