Damián Barreiro
Damián Barreiro

L’escritor Damián Barreiro Maceiras resultó ganador de la XXIV edición del Premiu Máximo Fuertes Acevedo d’Ensayu n’asturianu, que concede la Conseyería d’Educación y Cultura.

El xuráu encargáu de valorar les obres presentaes reunióse na mañana de güei, baxo la presidencia del director xeneral de Planificación Llingüística y Normalización, Fernando Padilla, y tuvo formáu pol escritor Xuan Santori, ganador de la edición pasada; la escritora Marta Mori, la profesora de la Facultá de Filosofía y Lletres Cristina Valdés, y los filólogos del Serviciu de Planificación Llingüística y Normalización Xosé Miguel Suárez y Luis Casteleiro.

Ente les obres presentaes, el xuráu decidió conceder el premiu a la titulada Asturploitation, que se presentó col seudónimu de Muxidora Brown, al reconocer nella “la relevancia social del tema tratáu y la propuesta estratéxica que fai pal impulsu del sector audiovisual en llingua asturiana, documentada con minuciosidá y rigor”, según destaca l’acta. Asina mesmo, el xuráu destacó la singularidá y el valir de los trabayos presentaos.

A esti gallardón, dotáu con 3.000 euros, podíen presentase obres de tema, xéneru y estructura llibre que reunieren les característiques del xéneru ensayísticu entendíu na so amplitú.

Damián Barreiro Maceiras (A Estrada, Pontevedra, 1984) ye periodista. Depués de ser redactor n’Asturies.com y nel selmanario Les Noticies, amás de presentador en programes de TLG, la tele local de Xixón, collaboró nel periódicu Diagonal Asturies, na sección «Escolinos» de La Nueva España y n’otros medios asturianos. Na actualidá trabaya na axencia de noticies Europa Press. Publicó les obres L’espeyu onde miranos (Premiu d’Ensayu Fierro Botas), Caleya Sésamu (Premiu d’Ensayu Máximo Fuertes Acevedo) y el llibru de divulgación Yo, la to llingua.