XixónTours organiza un ciclu de visites temátiques guiaes n’asturianu na villa de Xovellanos
La plataforma d’información sobre ociu, viaxes y turismu Conocer Asturies pon en marcha XixónTours, un ciclu de visites guiaes temátiques n’asturianu que van ufrise al públicu a lo llargo del mes d’avientu. Una d’elles va dar a conocer a los visitantes y xixoneses, los y les escritores n’asturianu que ñacieron o vivieron nel conceyu a lo llargo la hestoria, percorriendo dellos espacios venceyaos con ellos.
XixónTours ye una iniciativa de ConocerAsturies.es pa dar a conocer la ciudá de Xixón a los propios habitantes del conceyu y a los asturianos y asturianes en xeneral, asina como a cualesquier persona que viniendo d’otros llugares quieran averase a conocer distintos aspectos de la mesma sintiendo la visita n’asturianu.
Les rutes de XixónTours tán diseñaes pa buscar un averamientu orixinal a la hestoria de la ciudá, como la titulada «Escritores n’asturianu en Xixón», que dende la plataforma definen asina «Munches cais y places de Xixón escuenden trozos de la hestoria de la lliteratura asturiana. El desapaecíu quioscu de Pachín de Melás na Plaza del 6 d’agostu, el Teatru Xovellanos, onde s’estrenaron munches obres d’Eladio Verde, el conventu de Cimavilla onde tuvo Xosefa Xovellanos, asina como espacios qu’apaecen na obra d’autores contemporáneos como María Teresa González, Pablo Antón Marín Estrada o Vicente García Oliva. Estos y otros llugares, coles sos hestories, formen parte d’una visita onde lliteratura y hestoria xúntase pa dar a conocer la ciudá.»
Les feches y horarios de les visites guiaes “Escritores n’asturianu en Xixón”, son el xueves 20, a les 18:30 hores y el sábadu 29, a les 12 la mañana. Les visites tienen un costu de 5 euros pal públicu xeneral y 3 euros pa menores de 18 años y grupos escolares o xenerales de más de 15 persones. Ye obligatorio inscribise na páxina web www.conocerasturies.es/xixontours a lo menos con un día d’antelación. El pagu faise al entamu de la visita n’efectivu. Pa más información o duldes pueden ponese en contacto nel corréu xixontours@conocerasturies.es
El proyectu xestiónalu Conocer Asturies, al traviés de Cuatro Gotes Producciones y cunta col sofitu de la Oficina de Normalización Llingüística de Xixón.
Más información ya inscripciones en www.conocerasturies.es/xixontours
