L’autor Diego Solís ta acabante d’espublizar el so últimu poemariu, Volvemos en 6 minutos, una obra que ye más qu’un llibru y que s’alcuentra nestos intres na so xera de promoción, con presentaciones yá feches en Xixón, Uviéu o Villaviciosa, ente otros.
Esti miércoles, 28 d’avientu, coincidiendo col día de los Santos Inocentes, el poeta va tar faciendo un reality poéticu, col envís de siguir la llinia de la obra. Poro, Diego Solís va tar firmando llibros y escribiendo poemes inéditos en directu na oficina de Cuatro Gotes Producciones (cai Emilio Tuya 51, Xixón).
Volvemos en 6 minutos ye una obra onde nos alcontramos con una llectura fácil y que viaxa ente la televisión y lo dixital. Como nun podía ser d’otra manera, Volvemos en 6 minutos anicia’l so camín dende la Televisión del Principáu d’Asturies y con daqué tan clásicu de la cadena como una película de vaqueros que viaxa hasta Les Vegues y el so famosu cartel, anque nesti casu fálase de Corvera, non de Nueva York.
TCM, Netflix, HBO… toda una montonera de plataformes y canales colos qu’esfrutar o fadiar tienen sitiu nesti proyecto a mou de crítica social con películes y series, como La Naranxa Mecánica, Black Mirror (o espeyu negru) o La Llamada, ente otres. Pero non solo eso. Nun mundu dixital onde la televisión va perdiendo fuercia, les apps del móvil garren tamién un papel bien importante na composición de Volvemos en 6 minutos, criticando la casi dependencia y la necesida del so usu por parte de la sociedá en xeneral. Too ello pa rematar… como casi siempres rematen los canales de televisión: con una pausa publicitaria de contino que va de 6 minutos en 6 minutos, anque nesti casu la intención seya volver hasta lo eterno, daqué que casi se pue facer colos códigos QR qu’escuende cada poema del escritor xixonés.
