Esti viernes 5 de abril a les siete la tarde, el poeta xixonés Diego Solís, va presentar el que ye’l so primer poemariu n’asturianu «Y el mundu marcha», na llibrería Casa del libro, asitiada nel 3 de la Plaza Italia, en Xixón.
El llibru asoléyalu Saltadera Ediciones y nesta ocasión va cuntar cola poeta y vicepresidenta de l’Academia de la Llingua Asturiana, Mara Mori, como presentadora del actu.
EL LLIBRU
A partir del clásicu del cine mudu The Crowd (una película que desmitificó’l «suañu americanu», conocida ente nós col títulu Y el mundo marcha), Diego Solís constrúi un llibru que, ensin arrenunciar al compromisu social, al sentimientu de desarraigu, al amor y al desamor, cuestiona los valores de la so xeneración; aquella que, na so opinión, teniéndolo too pa triunfar, camina pa contra’l fracasu, col éxodu como filu conductor. Los intertítulos de la película de King Vidor son les estayes qu’estructuren el llibru.
Siguidor atentu del Surdimientu (cita a Piñán y a Texón), camuda la característica señaldá d’aquellos buscando perfacer una obra más directa, más urbana y vitalista, mientres que les referencies a la música o el cine ganen pesu: nun son un ecu, son parte del poema mesmu.
Un poema del volume Y el mundu marcha, de Diego Solís:
miraba atristayáu a los coches que pasaben.
Alcuérdome que mio padre aparó’l coche
y dímos-y un trozu de pan. Yo yera pequeñu
pero nun se m’olvida cómo fuximos d’aquello
que primero encadenamos.
L’AUTOR
Diego Solís (Xixón, 1991) ye graduáu y máster en Lliteratura Española, promotor de «Fame Poétika» y codirector de la revista Formientu. Tien espublizáu en castellán Hágase abril (2018) y fíxose col premiu Asturies Xoven de Poesía 2018 con Cállanos con esa música, una obra billingüe con dellos poemes n’asturianu y dellos en castellán, que verá tamién esti añu la lluz.
