Trenta y dos poemes formen La deuda, el primer poemariu n’asturianu de la poeta avilesina Esperanza Medina, conocida hasta agora pola so poesía en castellán. Esti llibru edítalu Trabe y nel apaecen versos llibres d’apariencia cenciella que falen del ayeri y, poro, del pasu del tiempo, que tenten de ser un homenaxe a les muyeres que la precedieron na familia y a la llingua que falaben: homenaxe que quier blincar perriba l’escaezu d’unes y d’otra, reviviles y dignificales: les sos vides y la so llingua.
La deuda ye una obra de reconocimientu, un pagu n’agradecimientu escritu en y con conciencia de ser muyer y de los riesgos que delles veces esti fechu impuestu pola naturaleza implica: el maltratu y la violencia de xéneru, que queden retrataos nestos versos.
Esperanza Medina (Avilés, 1964) diose a conocer como poeta en castellán con Escrito con la a (2006). Llicenciada en Filoloxía Hispánica, trabaya na enseñanza y tien espublizaos otros trés poemarios (Epanadiplosis o la metáfora de lo irremediable –2008–, Armadura de azúcar –2008– y No recuerdo un invierno tan frío como éste –2009–), amás del álbum ilustráu infantil El constipado del sol –2012–.
