Francisco Priegue ta acabante xubir el tráiler audiovisual del poemariu n’asturianu «Chemtrails surden na mio boca», llibru gallardonáu clol Premiu ‘Antón de Marirreguera’ 2018 y espublizáu por Saltadera.
Esti tráiler audiovisual fixéronla Macarena Bernardo y el propiu autor, Francisco Priegue. La mázcara testil ye de l’artista Bitxo, y el fondu musical de Tanya Tagaq.
La primer presentación del llibru va tener llugar el xueves 30 de mayu a les 19 hores nel Muséu Antón de Candás. La presentación va incluyir una performance poéticu-musical con dellos testos del llibru.
EL LLIBRU
Llámense chemtrails les esteles que surden al lliberar nel aire determinaes sustancies químiques o biolóxiques. Según teoríes conspiratives, inflúin na creación de patrones climáticos anómalos pa controlar el mediu ambiente y la salú de la población mundial.
Treslladando esa imaxe a poesía, con un ciertu bagaxe surrealista, Francisco Priegue constrúi un llibru sobre l’alteración de la realidá, tanto la personal como la colectiva.
Son trenta poemes los que nos apurre nesti primer premiu «Antón de Marirreguera» de
poesía, más otru que se forma al axuntar los primeros versos de cada poema, nel índiz
del llibru.
