L’emocionante reconocimientu a toa una xeneración con 35 histories de güeles anónimes escrites poles sos nietes y nietos
La hestoria de les nuestres güeles ye la hestoria d’heroínes anónimes que criaron, educaron y llucharon por dexanos un futuru meyor. Les sos vivencies probablemente nun vayan volver a repetise y nun hemos d’escaeceles. Por eso Puru Remangu asoleyó’l 9 d’avientu ‘Güeli. Histories d’amor y remangu’, un llibru que recueye 35 hestories de güeles asturianes escrites poles sos nietes y nietos. La publicación aporta otra vegada a les llibreríes tres d’escosar los primeros 500 exemplares en namás 20 díes.
Too entamó con un post nel Instagram de la marca de ropa Puru Remangu el pasáu marzu: “La historia de les nuestres güeles, tamién ye parte nuestra. Nun dexemos que s’escaezan les sos vivencies, les aventures, les penuries d’una guerra. Fala con to güela, escribi la so historia”. La idea daba forma a la iniciativa #30DíesConRemangu qu’añalmente llanza esta marca y qu’enllenó esta rede social coles esperiencies d’Olvido, Saluda, Esther, Ángeles, Marina, Julia y otres tantes muyeres anónimes qu’hasta agora nun recibieron nengún homenaxe públicu, pesie a ser una parte imprescindible de la nuestra hestoria.
L’ésitu d’esta iniciativa y el componente emocional y históricu merecía qu’estos testos nun quedaren namás n’Instagram y por eso Puru Remangu -col permisu de caduna de les y los autores-, decidió compilar les 35 narraciones nel llibru ‘Güeli. Histories d’amor y remangu’. A lo llargo les sos 96 páxines puen lleese vivencies como les de deprender a montar en bici, viaxar a Venecia, emigrar a Francia, trabayar de carbonera o nuna fábrica de conserves, montar un cine na cuenca del Nalón… Hestories escrites dende’l cariñu, que representen a toa una xeneración y que gracies a esti llibru van quedar pa la posteridá.
