Esti xueves 6 de febreru a les ocho la tarde va presentase en Xixón el llibru, «En primera persona» de José Ángel Gayol. L’actu va celebrase na Llibrería La Buena Letra (Cai Casimiro Velasco, 12 – Xixón) cuntando cola participación del autor, xunto al escritor y codirector de Formienrtu, Diego Solís.
En primera persona ye una triba de diariu lliterariu, que mira más pa fuera que pa dientro de quien escribe. Pero ye, tamién, un ensayu diarísticu o un diariu ensayísticu, y ye que José Ángel Gayol, escribiendo un diariu, da fe d’una realidá que parte del yo al empar que comparte col ensayu la tentación del análisis d’esa realidá. Y failo con una prosa esmerao, pulío, personalísimo, tresnao de referencies culturales, de reflexones apotaes y sensates.
José Ángel Gayol (Mieres del Camín, 1977), persona d’amplia formación y distintes inquietúes lliteraries, sociales y polítiques, ye escritor y críticu lliterariu. Poeta de voz propia (Los poemes del oriental, 2013; El llibru de les coses misterioses, 2013; Los suaños y los díes, 2014; y Una selmana y otros díes, 2015), d’hai poco ta amosándose como ensayista amenu y arteru, y d’esa manera lo manifiesta en Vértigu (2016) o n’Exercicios d’asturianu (2016). Narrador (Argonautes, 2007) y creador de testos teatrales (Ensin noticies del fin del mundu, 2011), tien ganao dellos de los premios más prestixosos de les lletres asturianes (Asturias Joven de Poesía (2005), de Textos Teatrales (2010), de Poesía «Elvira Castañón» (2011), «Fernán-Coronas» de Poesía (2011), «Xuan María Acebal» de Poesía (2012) y «Máximo Fuertes Acevedo» d’Ensayu (2015 y 2019).
