Esti prósimu vienres, 19 de payares, l’autor José Ángel Gayol va presentar la so obra nueva, espublizada con Ediciones Trabe. La presentación va celebrase na llibrería La Pilarica de Mieres a les 19 hores y va tar acomañáu por Nicolás Bardio.
«Los cuerpos celestes» recueye diez cuentos de distintes factures nos que predomina’l reflexu d’un modelu d’escritura realista. Vides anónimes nes que la rutina apodera con too hasta que daqué inesperao pasa franciendo la cotidianidá d’unos personaxes siempres en movimientu. Esi rompimientu val-y al narrador p’abrir la posibilidá de la introspección y l’autoanálisis y amuesa lo que de ficción hai nes rellaciones humanes. Con un ritmu narrativu bien lleváu y un llinguaxe claru, tresparente y certeru, l’autor fai un retratu individual y colectivu d’una sociedá desnortiada y a la busca d’una felicidá qu’igual nin tan siquiera existe.
José Ángel Gayol (Mieres del Camín, 1977), persona d’amplia formación y distintes inquietúes lliteraries, sociales y polítiques, ye escritor y críticu lliterariu. Poeta de voz propia (Los poemes del oriental, 2013; El llibru de les coses misterioses, 2013; Los suaños y los díes, 2014; y Una selmana y otros díes, 2015), d’hai poco ta amosándose como ensayista amenu y arteru, y d’esa manera lo manifiesta en Vértigu (2016) o n’Exercicios d’asturianu (2016). Narrador (Argonautes, 2007) y creador de testos teatrales (Ensin noticies del fin del mundu, 2011), tien ganao dellos de los premios más prestixosos de les lletres asturianes (Asturias Joven de Poesía (2005), de Textos Teatrales (2010), de Poesía Elvira Castañón (2011), Fernán-Coronas de Poesía (2011), Xuan María Acebal de Poesía (2012) y Máximo Fuertes Acevedo d’Ensayu (2015 y 2019).
