La llibertá los caminos, primer novela de José Luis Rendueles, qu’edita Trabe, ye una hestoria a dos tiempos: nún nárrase la vida de Doña, de los Texedores d’Urbiés, madre del sindicalista de la Internacional Sindical Roja y de la CNT Jesús Ibáñez y tía-cuasi madre de Constantino Turón, el bandoleru famosu de la zona que robaba a la xente rico pa dar a quien nada tenía.
Madre soltera en malos tiempos, recala na Francia refinada d’a finales del sieglu XIX y ellí alquier cultura y modales, viaxa y respira aire nuevo. De vuelta pa España, conoz al Tuertu, borrachín y candongueru, col que tien fíos y vive na independencia que da andar pelos caminos. Muyer valiente, culta y llibre, acaba la vida en Xixón y dexa un fíu col mesmu arguyu y sentíu de la llibertá y la xusticia: Jesús Ibáñez.
N’otru tiempu, el d’anguaño, l’escritor de la novela sobre la Doña y el fíu anarquista va cuntándonos el procesu d’escritura, formando una meta-novela na que nun falta la crítica a la lliteratura y a la sociedá del so tiempu.
José Luis Rendueles (Xixón, 1972) ye poeta y narrador. Empezó la carrera lliteraria escribiendo en castellanu, pa nos primeros años del sieglu XXI pasar a usar l’asturianu na so obra. Como poeta ganó dellos premios de prestixu nes lletres asturianes («Xuan María Acebal», 2001 y «Fernán-Coronas», 2002) y tien publicaos los poemarios Casería (2002), Albentestate (2003), Cabudañu (2006) y Ferruñu (2007). Narrador de rexistros varios y temátiques distintes, nel 2001 estrenóse n’asturianu col volume Cuentos chinos. Nel 2007 dio a imprenta Los meyores cuentos del mundu y otres proses mongoles. Tres de quince años de silenciu ofrez al públicu llector La llibertá los caminos, la so primer novela.
