Bertu Ordiales (Pola de L.lena, 1972), llicenciáu de Bioloxía y con percorríu nel mundu lliterariu con obres como 21 rutes de senderismu n’Asturies (Trabe, 2002), del que foi coautor, y Guía de los árboles d’Asturies (Trabe, 2006), presenta esti vienres 13 de marzu’l so llibru Llugares máxicos d’Asturies. Aparte de ser un amante de la ciencia, miembru de Sabencia, la Sociedá Asturiana de les Ciencies y articulista nel diariu La voz de asturias, Ordiales ye tamién un apasionáu de la cultura tradicional asturiana y un fiel defensor del prestixu y la llingua asturiana. Asina lo demuestra nesti llibru, nel qu’algama sesenta llugares del territoriu asturianu acompañaos con al menos dos semeyes y un testu descriptivu.
Los llugares constitúin toos espacios con una lleenda detrás, onde la maxia del pasáu sobrevive entovía hasta’l presente. Llugares tocaos pola mitoloxía asturiana y pola herencia de los antiguos ástures. Delles zones recoyíes tamién son llugar de misteriu y de símbolos difícilmente interpretables.
Pero esti llibru tamién fala de la tierra onde habitaran los ástures, del so territoriu y les sos característiques xeográfiques ensin escaecer los estraños llugares onde moren, anguaño, les xanes o los cuélebres.
