Dende la nuesa publicación llamentamos la muerte del esfritor y estudiosu Xosé Bolado. Bolado foi responsable de la revista Lliteratura y dio voz a autores que col tiempu foron importanntes. Ye pa nós un referente nesi sen, amás d’un estudiosu clave pa entender les nueses lletres contemporánees.
Bolado tuvo siempres sofitu y bona pallabres pa la revista Formientu, presentando en Madrid un númberu de la mesma, prestándo-y siempres atención y falando de la revista en dalgunos de los sos artículos.
Nacíu n’Uviéu en 1946 y vecín de Xixón, Xosé Bolado llicencióse en Filosofía y Lletres (Filoloxía Románica) na Universidá d’Uviéu, especializándose llueu n’estudios lliterarios. Profesor d’Enseñances Medies, desendolcaría’l so llabor profesional n’institutos d’Asturies y de Madrid, a onde se treslladó nos últimos años de la so carrera docente.
Venceyáu yá dende finales de los 70 del pasáu sieglu XX al modernu procesu de reivindicación de la llingua asturiana, Xosé Bolado foi nomáu académicu de númberu de l’Academia de la Llingua Asturiana nel añu 1988, faciéndose cargu dientro de la institución de temes rellacionaos cola so especialización profesional. El primer resultáu d’esta xera cuayaría na edición de la revista de creación lliteraria moderna Lliteratura. Revista lliteraria asturiana, de la que foi direutor dende 1990 hasta 2017. Xunto con ello, Xosé Bolado tuvo tamién al cargu, a lo llargo de munches ediciones, de l’asignatura de «Lliteratura Asturiana» ufiertada nos destremaos cursos y niveles de formación de l’Academia. Collaboró igualmente cola revista Lletres Asturianes y con distintes ponencies y comunicaciones presentaes nes Xornaes Internacionales d’Estudiu.
Poeta n’asturianu y en castellán, antólogu y críticu lliterariu, déxanos una llarga y granible obra que destaca pol rigor, la precisión del análisis y el fondu conocimientu de los temes que trataba y estudiaba. Ente ello, ha sorrayase en primer llugar l’Antoloxía poética del Resurdimientu (1989), una esbilla de la obra de diez poetes de les dos primeres xeneraciones del Resurdimientu, como a él-y prestaba más llamar, en cuantes que consideraba que tola tradición lliteraria asturiana anterior xustificaba dafechu’l falar d’esi resurdir. Tamién, la edición d’Escritores en Llingua Asturiana (1992); el fascículu «Lliteratura asturiana contemporánea» de la Historia de Asturias de La Nueva España; los capítulos «El Surdimientu. La poesía» y «El Surdimientu. El teatru» de la Historia de la Lliteratura Asturiana; los poemarios Nomade (1991, n’italianu); Conxura contra la decadencia y Na estación de los relevos (2002 y 2006, n’asturianu); Línea imperceptible al temor (1988, en castellanu)… Estudiosu fondu de la obra de Rosario d’Acuña, entamaría a publicar la producción d’esta autora dende 1985 (El Padre Juan), asoleyando en 2007 la edición d’Obras reunidas.
A esti llabor, curtiamente reseñáu equí, hai qu’amestar la presidencia del Atenéu Obreru de Xixón onde, amás de coordinar munches actividaes, conferencies, esposiciones, etc., Xosé Bolado fundaría la coleición poética «Deva».
Queríamos vivir
A la lluz escasa de los vencíos
semabes grana de cosmos en marzu.
Yo conocía
de marzu la infinitú del agua,
la fidelidá del aire a los barcos
de travesía, la blancura violeta
del Aramo… Tu, sabíes de la muerte,
el so roce de pluma.
Los dos
queríamos vivir.
…
