El martes pasáu celebróse la entrega de pemios del segundu concursu «Selmana de les Lletres na FSA-PSOE” de microrrellatos n’asturianu en Twitter.
Nesta edición recibiéronse más de ochenta testos, de los que’l xuráu destacó «la calidá de los testos». El xuráu tuvo formáu pol periodista, profesor y presentador de televisión, Inaciu Galán, l’escritor, profesor y miembru de l’Academia de la Llingua Asturiana, Pablo Texón, la poeta y directora de la Editorial Trabe, Esther Prieto y la secretaria de Educación, Universidá y Normalización Llingüística, Mari Luz Pontón.
Esti añu la ganadora foi l’autora, directora y actriz, Laura Iglesia, con un testu calificáu pol xuráu como «perguapu» y «qu’axunta condensación llírica, esposición emocional y sorpresa amenazante»; el segundu premiu, foi pa un rellatu en gallego-asturianu d’Iván de Cazarón, profesor y collaborador de revistes y otres publicaciones, del que’l xuráu esplicó «fala na outra llingua d’Asturias del paso del tempo, de como a vida é breve y tamén de como merez a pena vivirla, por muito qu’as veces as cousas nun son como esperamos».
El tercer premiu foi pal rellatu de César G. Herrerías que según el xuráu «treslládamos a un futuru apocalípticu nel que como nesta Asturies de nueso, la mocedá tien de colar, magar que nesti casu marchen pa otros planetes, sustituyíos por robós».
Ente los finalistes tuvieron autores como María Llatores, Raquel F. Menéndez, Bertucu, Dani Rodríguez Blanco, Xuan Miyar, Santos Tejón, Xosé Ramón Ardines o José Luis Suárez Arias.
Los tres premiaos recibieron un llote de llibros y un diploma y los que resultaron finalistes, un llibru y un diploma.
Puedes lleer tolos rellataos ganadores y los 80 presentaos equí.
