L’escritor maliayu Lluis Portal Hevia ta acabante poner nel mercáu, «Xurde amante y el Club de los Valientes», una novela xuvenil qu’Ediciones Trabe saca al mercáu na so colección Pesllera.
Na obra, Xurde Amante, el protagonista que nos cuenta la historia, y los collacios Pablo Sierra y Andrés Collado, estudiantes d’un colexu de prestixu qu’esfruten cola lliteratura d’aventures y de xéneru, formen el Club de los Valientes col oxetivu de «desfacer entuertos». Nun van tener qu’esperar muncho pa que-yos salgan desapaiciones y otros misterios pa resolver.
Lluis Portal Hevia (Villaviciosa, 1964) ye periodista profesional con munchu llabor en distintos periódicos. Anguaño coordina xunta Xuan Pedrayes la revista cultural n’asturianu Friuz, fundada nel 2016. Ganador nel 2011 del Premiu «Máximo Fuertes Acevedo» d’Ensayu col trabayu Cipriano Folgueras, una gloria d’Asturies (2012), tien publicaos llibros de distinta factura: etnográficos, biográficos, teatrales, de cuentos y rellatos, amás d’una montonera d’artículos d’opinión en periódicos, blogues y webs. Xurde amante y el Club de los Valientes ye la segunda novela xuvenil que publica, tres de Pelegrinos del abismu (2010).
