El músicu Maxi Areñes torna a la Llibrería La Llocura de Mieres del camín pa presentar el so llibru «Cuentinos dende Areñes», ilustráu por Maitetxu Isla. Nel actu, que va celebrase’l vienres 14 a les 19 hores, va tar acompañáu pol escritor, xestor cultural y presentaoddor de TPA, Ismael María González Arias y pola panderetera Silvia Suárez.
Maxi Areñes ta nesti momentu inmersu nuna xira na que va percorrer otros conceyos y llugares presentando’l volume de cuentos. El vienres 21 va tar en Villamayor y el sábadu 22, en Coya, dambos llugares del conceyu de Piloña.
L’AUTOR
Maxi Areñes (Xixón, 1972) tien una amplia trayectoria como músicu y como impulsor de diverses y variaes iniciatives culturales, ente les que destaquen esposiciones artístiques, alcuentros poéticos, charres sobro les más diverses temátiques, conciertos y tou tipu d’eventos nos que la cultura ye’l filu conductor.
EL LLIBRU
El llibru «Cuentinos dende Areñes» ye una serie o compilación de cuentos curtios de temática alegórica de perfil social, cotidianu, políticu y hasta ciertu puntu filosóficu.
Na llinia de les fábules d’Esopo, estos «Cuentinos dende Areñes» pretenden dar un saltu dende lo pequeño y concreto hasta lo universal, estrapolando asina too aquello que mos ye común, vivamos onde vivamos. Con prólogu d’Enrique Carballeira (ilustrador y periodista de reconocida trayectoria) y coles ilustraciones de Maitetxu Isla (ilustradora y artista multidisciplinar), estos «Cuentinos dende Areñes» averen a tolos públicos, por mor del calter alegóricu de les sos narraciones, los más pequeños pueden da-y una llectura más cenciella y hasta cómica, y al empar, el públicu adultu va poder estrayer otres conclusiones, reflexones o guiños extrapolables a la realidá más cotidiana, con tintes munches vegaes de crítica social o política. Escritu íntegramente en asturianu, revélase tamién como una reivindicación de lo propio, de la identidá de too un pueblu qu’aguanta en llucha permanente, defendiendo’l so patrimoniu cultural y humanu.
Les narraciones de Maxi Areñes tán escrites y creaes dende un pequeñu requexu na redolada más rural d’Asturies, onde la tradición oral al traviés de cuentos, lleendes y hestories que pasen de xeneración en xeneración conformaron la evolución de les sos xentes, de los sos neños, del imaxinariu colectivu, de los mieos, rises y esperances de los sos habitantes. Más que recomendable pa toes aquelles persones qu’esfruten de la fantasía, que gocien con curtios momentos de fuximientu lliterariu, y que quieran enfusase y averase a la llingua y tradición asturiana.
Los rellatos del llibru tienen como personaxes principales a animales, persones y seres mitolóxicos qu’inda na actualidá tienen muncho pesu nel calter asturianu y que tienen los sos raigaños na mitoloxía celta, acomuñada a la naturaleza y a les sos fuerces poderosu y misteriosu: el cuélebre, la xana, el nuberu, el trasgu…encarnen fuercies de la naturaleza o esplicaciones máxiques a fenómenos sorprendentes. Esti compendiu de cuentos puede ser tamién xuna ferramienta pedagóxico ideal p’animar a los más pequenos a la llectura y a la fantasía, al viaxe mental que supón la llectura; puede usase en cuentacuentos, en biblioteques, n’escueles….inclusive en pequeñes representaciones teatrales o con marionetes, aguiyando d’esta manera inda más la imaxinación. Gallos, pites, raitanes, melandros, gochos, tordos, gatos y demás fauna encabecen un repertoriu que xunto con esos seres mitolóxicos de calter máxicu trespórtennos a un mundu imaxináu ya imaxinariu que remembra la infancia, al empar que mos convida a ser testigos d’una vida cuasi perdida nos pueblos d’Asturies, nos que l’agricultura, la ganadería y les estaciones del añu rexíen la cotidianidá de los sos habitantes axuntándolos al escurecer alredor de les cocines de lleña o carbón pa cuntar lleendes, cuentos, o anécdotes qu’acompañaben depués los sos suaños.
