L’escritor Miguel Rodríguez Monteavaro (Bual, 1990) foi’l ganador del Concursu de Cuentos pola Oficialidá del Asturianu, que convoca’l Conceyu Bimenes y qu’esti añu llegó a la so edición númberu venticinco. El primer premiu, dotáu con 600 euros, foi pa la so obra “Tucapel”. El segundu premiu, dotáu con 450 euros, foi pal cuentu “Teresa”, de Solinca Turbón Cuesta (La Felguera, 1981), y Gonzalo González Barreñada (Sotrondio, 1973) algamó’l tercer premiu, al que se-y apurren 300 euros, con “Verde como los sos güeyos”. Nesta edición el xuráu tuvo compuestu polos escritores Xulio Vixil, José Ángel Gayol y Pablo Rodríguez Medina. Nes próximes selmanes l’Ayuntamientu Bimenes dará anuncia de la fecha d’entrega de los premios, actu nel que l’autor bualés fadrá llectura pública del cuentu ganador.
Miguel Rodríguez Monteavaro ye filólogu, músicu y escritor tanto n’asturianu como en gallego-asturianu. Nesta última estaya tien espublizaos cuatro llibros de poesía: “Trenta razóis pra nun medrar” (Trabe, 2010); “Todos os tristes de mayo” (Trabe, 2013); “Poemas pr’amantes y paquidermos” (Trabe, 2013) y “Superpoderes” (Trabe y Gobiernu del Principáu d’Asturies, 2020). Y, amás, ganó los siguientes premios lliterarios: “XIX Premio Xeira de Narracióis Curtias” (2009); “XIX Premio de Poesía Padre Galo” (2012); “VI Premiu de Narraciones Curtias de Cangas del Narcea” (2014); “Asturias Joven de Poesía” (2019); “IX Premiu de Narraciones Curtias de Cangas del Narcea” (2021); “I Premio Ría del Eo de Poesía” (2021) y “Residencia Asturies” (2021).
