L’escritor entreguín Pablo Rodríguez Medina (L’Entregu, 1978) resultó ganador de la sesta edición del Premiu de Rellatos Curtios ‘Xosé Caveda y Nava’, convocáu pol Conceyu de Villaviciosa y que cunta con una dotación económica de 1000 euros. El xuráu, formáu pol escritor Francisco Álvarez González, ganador de la edición anterior, el técnicu en normalización llingüística Rafael Rodríguez Valdés y la filóloga Marta López Fernández, actuando como secretariu Pablo Suárez Fernández, del Serviciu de Normalización Llingüística de la Comarca de la Sidra, decidió conceder el premiu al rellatu del autor tituláu ‘Redención’ del que destacó la cotidianidá y emotividá de la trama y la cercanía y actualidá de la temática.
Pablo Rodríguez Medina ye llicenciáu en filoloxía hispánica y especialista en llingua asturiana, amás de miembru de l’Academia de la Llingua Asturiana dende 2020. Poeta, narrador y dramaturgu, tanto en castellán como n’asturianu, cunta con una estensa obra cola que tien algamao premios como’l Xosefa Xovellanos de novela, con L’Arna de San Atanás y Fame d’amor, determín de pasión, o’l Teodoro Cuesta de Poesía con Aires de mudanza (y un apendix probi d’amor).
