L’Academia de la Llingua Asturiana ta acabante anunciar que l’escritor y profesor entreguín Pablo Rodríguez Medina llogró la elección por unanimidá na votación que constituyó l’únicu puntu del orde del día de la Xunta Estraordinaria de la institución, desendolcada’l xueves 10 de setiembre nel llar uvieín de l’ALLA.
La institució esplica nuna nota de prensa que «El so currículu lliterariu, de primer nivel, ta compuestu d’obres de gran valir nos trés grandes xéneros, lo que-y fixo collechar bien de premios del mayor prestixu igual en narrativa, qu’en poesía y en teatru». La máxima institución de la llingua asturiana reconoz tamién con esti nomamientu la que camienten «impoortante contribución pedagóxica, que vien exercitando nel ámbitu regláu como profesor funcionariu de Secundaria y tamién como docente, dende cuantayá, de la Universidá Asturiana de Branu», asina como «la so fidelidá incondicional a la Institución».
Pablo Rodríguez Medina va recibir solemnemente la so nueva condición d’Académicu Correspondiente de l’ALLA nel Día de les Lletres Asturianes, qu’esti añu va celebrase nel Aula Magna de la Universidá d’Uviéu, el 2 d’ochobre, nun actu restrinxíu y afayáu a les condiciones hixénico-sanitaries anguaño imperatives.
