La vixésima cuarta edición del Premiu Xuan María Acebal de Poesía n’asturianu recayó nel escritor Pablo Texón Castañón. El premiu, que concede la Conseyería d’Educación y Cultura, tien una dotación de 3.000 euros.
El xuráu encargáu de valorar les quince obres finalistes tuvo presidíu pol director xeneral de Planificación Llingüística y Normalización, Fernando Padilla Palicio, y integráronlu los escritores Pablo X. Suárez Fernández, Aida Fernández Escudero, Marisa López Diz, Lourdes Álvarez García y Xosé Miguel Suárez Fernández.
A esti gallardón podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que fueren inéditos y non premiaos n’otros concursos.
Ente les obres presentaes, el xuráu decidió conceder el premiu al poemariu tituláu Allumamientu, destacando “la orixinalidá temática, asina como la destreza rítmica y la variedá estilística de los poemes, que-y permiten construyir una voz poética singular pa reflexonar sobre la paternidá dende una concepción esperiencial”.
La obra presentóse col seudónimu Bartleby. Abierta la plica, l’autor ganador resultó ser Pablo Texón Castañón.
Pablo Texón Castañón (Felechosa, 1977), profesor d’enseñanza secundaria, ye collaborador habitual en diarios y publicaciones como La Nueva España, El Comercio, Eventual, Lliteratura, Campo de los Patos, etc. Ganador de los premios de poesía Nené Losada Rico (año 2005) y Teodoro Cuesta (2007), la so producción poética en volume recuéyese nos poemarios Toles siendes, La culpa y la lluzy el recién Media vida. Poemas y cantares, editáu’l pasáu añu 2017.
Lletrista de dellos grupos musicales de la escena asturiana (Dixebra, Verdasca, Alfredo González, Toli Morilla…) ye tamién responsable de la versión asturiana de Xulia (2007), d’August Strindberg, pa Teatro Margen, y publicó nel 2013 Un corte de pelo, selección poética de Raymond Carver.
