Pablo Texón
Pablo Texón

La ventésima séptima edición del Premiu Xuan María Acebal de Poesía n’asturianu recayó nel escritor Pablo Texón Castañón. El premiu, que concede la Conseyería de Cultura, Política Llingüística y Turismu ta dotaú con 6.000 euros.

El xuráu encargáu de valorar les doce obres finalistes tuvo presidíu pol Director Xeneral de Política Llingüística, Antón García Fernández, ya integráu polos escritores Marina Pangua Cuesta, Esther Prieto Alonso, Alba González Sanz, Rodrigo Olay Valdés y Alejandro Fernández-Osorio García, ganador de la edición pasada.

A esti gallardón podíen presentase poemarios de tema y estructura llibres escritos en llingua asturiana con una estensión mínima de quinientos versos, siempre que fueren inéditos y non premiaos n’otros concursos.

Ente les obres presentaes, el xuráu decidió conceder el premiu al poemariu tituláu Cantar de ti mesma destacando la intencionalidá de cantu que tien el llibru al romper colos esteriotipos de les elexíes y los cantos de duelu. La voz de cellebración que lu percuerre atrévese a combinar diferentes opciones formales en poemes a lo llargo del testu: de versu llibre a cuartetes, de coros a coples o haikus, ensin perder frescura, regularidá nin impactu, pues ye bien conocedor de les formes que manexa y qué temátiques concretes son les que reclamen eses formes

La obra presentóse baxo l’alcuñu W.W. N’abriendo la plica, l’autor ganador resultó ser Pablo Texón Castañón.

Pablo Texón Castañón (Felechosa, 1977), ye profesor de Llingua Castellana y Lliteratura, Lliteratura Universal y Llingua Asturiana y académicu correspondiente de la Academia de la Llingua Asturiana. Tien artículos publicaos en diarios y publicaciones como La Nueva España, El Comercio, La Voz de Asturias, Les Noticies, etc. y figura en más d’una ventena d’antoloxíes poétiques y narratives.

Foi ganador de los premios de poesía Nené Losada Rico (añu 2005), Teodoro Cuesta (2007) y d’esti mesmu Premiu Xuan María Acebal de Poesía n’asturianu na convocatoria de 2018. La so producción poética en volumen alcuéntrase nos poemarios Toles siendes, La culpa y la lluz, Media vida. Poemes y cantares y Allumamientu editáu hai dos años.

Lletrista avezáu de diversos grupos musicales de la escena asturiana (Dixebra, Verdasca, Alfredo González, Toli Morilla…) ye tamién responsable de la versión asturiana de Xulia (2007), de August Strindberg, pa Teatro Margen, y publicó en 2013 Un corte de pelo, selección poética de Raymond Carver.