La escritora Vanessa Gutiérrez foi la ganadora esti añu del premiu «Teodoro Cuesta» de poesía. El xuráu decidióse pol poemariu tituláu «Refraneru popular» que Gutiérrez presentaó sol seudónimu de Seronda. La escritora algamara yá en 2003 esti premiu con «La danza de la yedra».
El xuráu tuvo formáu nesta ocasión por Xuan Bello, Xosé Ramón Iglesias Cueva, Ánxel Álvarez Llano, Lourdes Álvarez y Esther Prieto. El conceyal Faustino Zapico actuó como presidente, mientres que’l director de la Casa Cultura de Mieres, Ismael María González Arias, foi’l secretariu, los dos últimos ensin voz nin votu.
El conceyu de Mieres anunció que del total de poemarios presentaos, nuna primer ronda de deliberaciones salieron escoyíos, amás del ganador, «Les blanques fogueres», «La deuda», «El raitán versus sangrín», «El pesu de la llume», «El color de los días», «600 euros versus nada», «La soledá del meridianu» y «Poemes del amor simétricu». Ente estas quedaron como finalistes «Refraneru popular», «La deuda» y «El pesu de la llume», siendo escoyida ganadora la obra de Vanessa Gutiérrez por unanimidá.
El premiu d’esta edición ta dotáu con 4.000 euros n’efectivu, amás de la espublización del poemariu.
