«Velea», el poema de Berto García ente los «meyores poemes del mundu»

Berto García finalista nel VIII Premiu Internacional de Poesía Xovellanos con un poema n’asturianu

L’autor de Les Vegues foi ún de los tres finalistes VIII Premiu Internacional de Poesía Xovellanos «El meyor poema del mundu» cola so composición ‘Velea’, faciendo que l’asturianu tea valoráu como otres de les llingües participantes nel certame y con un notable éxitu onde participaron 2.669 poemes, escritos en 19 idiomes distintos, que llegaron dende 52 países diferentes. Poemes d’autores españoles; d’Arxentina; de Colombia, de México y Perú, pero tamién de Sudáfrica, Namibia o Turquía.

Berto García fixo estes delcaraciones pa Formientu.com tres tener esti resultáu nel Premiu: «Quedar finalista nesti premiu tien el valir de qu’un poema escritu n’asturianu tuvo les mesmes posibilidaes de ganar qu’otru escritu en cualisquier idioma del mundu. Ye un pasu más na normalización d’esta llingua y una amuesa de la vitalidá de la lliteratura escrita na nuesa llingua. Gana la nuesa llingua y la so lliteratura que se fae un migayu más visible pa la sociedá asturiana».

Berto García ñaz en Les Vegues (Corvera), en 1975. L’autor tien siete poemarios editaos: Ensin otra sida (Trabe, 2005), Treslallende (Trabe, 2007) [escritu a medies con Carlos Suari], Manual contra’l vacíu (Trabe, 2008) [Premiu Fernán Coronas 2007], Cuando’l mundu debala (Academia de la Llingua Asturiana, 2011) [Premiu Llorienzu Novo Mier 2009], Inercia (Trabe, 2013), Tendal (Suburbia, 2013) y Esconderite (Trabe, 2016). Tien amás bien d’obra espardío peles revistes lliteraries del país, como: El Canciu’l Cuélebre, Lletres Asturianes, Lliteratura, Formientu, Lletres Lliterariu o Entellunu, y nes antoloxíes Pa[i]saxes, Cuando la memoria fala, Mina de palabras, poemAEs y Al Horru II.

Ye’l responsable de la compilación de poesía contemporánea n’aturianu, Contra’l silenciu (Suburbia, 2014). Tien feches les tornes,  na estaya de la lliteratura infantil, pa la editorial Cumio, de los llibros Florenta, la gata poeta (2007) y Les fábules de Leonardo da Vinci (2008).  L’autor ye mayestru d’Educación Infantil, amás d’espertu en llingua asturiana.

Ufrimos el poema a los nuesos y les nueses llectores.