Esti xueves 20 de febreru a les 19:30 hores, Xuan Santori va presentar el llibru La lluz heredada, asoleyáu por Ediciones Trabe. L’actu va tener llugar en La Casa del Libro, na Plaza Italia, 3, en Xixón. Va participar, amás del autor, Esther Prieto, d’Ediciones Trabe. La lluz heredada recueye dos volúmenes independientes de narrativa, reconocíos col Premiu de la Crítica, que Santori foi publicando a lo llargo la primer década del sieglu XXI baxo los títulos La heredá (2005) y La fábrica de lluz (2008).
Xuan Santori (Uviéu, 1968) ye doctor en Filoloxía pola Universidá d’Uviéu, poeta de gran sensibilidá (Zunes, 1998; Les inconveniencies de la especie, 2000; Bis a bis, 2004; y Según cumple’l día, 2015), traductor seguru y ensayista d’altor, comprometíu cola esperiencia vital de la que ye testigu (42.553. Depués de Buchenwald, 2018). La so obra ta reconocida colos premios más importantes de les Lletres Asturianes. Los sos estudios sobre la lliteratura asturiana y la so influencia sobre la llingua quedaron reflexaos nos llibros Milenta voces. Visiones del Surdimientu (2006) y El Surdimientu y la lliteratura n’asturianu: normalización y estandarización (2013).
