Claudia Gutiérrez Lueje ya Inaciu Galán reciben el segundu y tercer premiu
Xurde Menéndez Caravia proclamóse ganador de la cuarta edición d’Entaína a escribir. Concursu de microrrellatos improvisáivos n’asturianu pa la xente mozo, que se celebró esti martes pela nueche na Sala Borrón d’Uviéu, entamáu pola Dirección Xeneral de Planificación Llingüística y Normalización y l’Institutu Asturianu de la Muyer y Polítiques de Mocedá.
Nel certame podíen participar persones ente 14 y 35 años d’edá, que teníen d’ellaborar un microrrellatu nun tiempu máximu de 20 minutos, a partir del tema y indicaciones que’l xuráu dictare nel momentu d’empezar a escribir.
Concediéronse trés premios, consistentes en llotes de llibros y discos. Como segundu y terceru quedaron, respectivamente, los rellatos de Claudia Gutiérrez Lueje ya Inaciu Galán.
El ganador va participar como xuráu nos premios Culturaquí 2019 que convoca l’Institutu Asturianu de la Muyer y Polítiques de Mocedá. Pela so parte, la Dirección Xeneral de Planificación Llingüística y Normalización va procurar promocionar y divulgar los microrrellatos ganadores, pudiendo incluyilos en publicaciones o antoloxíes qu’edite.
Al actu asistieron la directora xeneral del Institutu Asturianu de la Muyer y Polítiques de Mocedá, Almudena Cueto Sánchez, y el director xeneral de Planificación Llingüística y Normalización, Fernando Padilla Palicio.
